Tárip etsem, Ádil qalmaq,Aytıp óteyin bilgenim.Waspın aytıp xatqa salsaq,Hám esitip, hám kórgenim.
Sharўa gezer qonıs penen,Úlpet boldıń bolıs penen,Ashna yar-dos bilis penenYalǵandı oynap kúlgeniń.
Atań seniń tawdan asqan,Nesibesin bunda shashqan.Kórgenin qorjınǵa basqan.Olja qızdur mamań seniń.
Olja qızdur mamań nashar,Onnan tuwǵan túbiń qulshar,Qul tuxımı qulǵa usar,Dosım awsar babań seniń.
Ata-babań ótken jeri,Toy-sáranjam etken jeri,Jurtqa xızmet etken jeri,Qazaqdárya – jayıń seniń.
— Berdaq - Tańlamalı shıǵarmalarınıń jıynaǵı
Soǵımıńnıń bári semiz,Attan – ayǵır, maldan – ógiz,Esap etseń eki segiz,Baylap soyǵan qoyıń seniń.
Aydos biy dáryaday tastı,Úsh aǵash qurıp kisi astı,Arzı qosqa adam qostı,Solarday zulımıń seniń.
Júzden júyrik, mıńnan tulpar,Qus jaqsısı tuyǵın, suńqar,Qırq adam bolsa xızır bar,Ne bilsin sahrayıń seniń.
Toyxanaǵa qazdıq oshaq,Saqalıńa buwrıl bir qushaq,Kóziń ala, murnıń shoshaq,Haslı quldur babań seniń.
Toyǵa adam kóp keledi,Sıy kóremen dep keledi,Qulen bolıs ókpeledi,Kelmedi me shamań seniń?
Toy bermek ne edi maqsetiń,Bilseń toyıńda aqsadıń,Shúrshit qalmaqqa uqsadıń,Lalawlaǵan tiliń seniń.
Qosım qaraqshı nókerin,Kóp eken qayqı hákerińAlpıs batpan shay-shekeriń,Jetpis batpan yaǵıń seniń.
Qudań bolıs, sen aqsaqal,Azayǵanday kóp ǵalmaǵal,Bul sózlerim emes ǵawal,Teńlesipti boyıń seniń.
Hayalıń seniń balǵalı,Óziń aqsaqal bolǵalı,Balǵalıdan qız alǵalı,Sambıraydı sabań seniń.
Sirá seniń duzıń kemdi,Dúziw bermediń tóreńdi,Zarlattıń Eset gereńdi,Til hazarı babań seniń.
Shúrshit qalmaq jetti páreń,Ákeń seniń Eset gereń,Bolıs bolsań adam jereń,Abıray aqsaqal bolǵanıń.
Sen júripseń eldi gezip,Hárkimge bergen bir nesip,Puxarań júr sennen bezip,Abırayıń ketti seniń.
Berdekeń aytar kúygennen,Haslı-zatıńdı bilgennen,Bunday aqsaqal bolǵannan,Jaqsı edi ólgeniń seniń.