Balam

Altaqlama, taltaqlama,Birew urdı dep jılama,Ash bolaman dep oylama,Jigerli bol jastan balam.

Óshińdi al dushpanıńnan,Kúshińdi jıyna jasıńnan,Xalqıń qalmasın qasıńnan,Kishi peyil bol jastan, balam.

Menmen bolma Pirimbayday,Qudayım etpesin onday,Seldir bolıp seńseń tonday,Sılbırap hám júrme balam.

Belińdi buw, jeńińdi túr,Dos-dushpanıńdı sınap júr,Jaqsı sózge qulaǵıń túr,Jaman sózden qashqıl balam.

Malım joq dep hesh muńayma,Berer qudayım mańlayǵa,Dushpanǵa túspe ońayda,Kóziń ashıp júrgil, balam.

Jaman atıń túsip kózge,Sarǵısh endirmegil júzge,Erme hasla shuǵıl sózge,Ǵıybat sózden qashqıl balam.

Atım joq dep arsınba da,Tonım joq dep tartınba da,Jamanlardan uyalma da,Orın tawıp otır, balam.

Toyǵa barsań barǵıl burın,Dushpanıńnıń úzip torın,Joqarıda alǵıl orın,Hesh waq tómen bolma balam.

Birew seni jamanlasa,Kórmegenge datqalasa,Aytqan sózinde turmasa,Onnan qashıp júrgil balam.

Mańlayıńnan aǵızıp ter,Jaqsı-jamandı sınap kór,Jaqsı adamnıń keynine er,Sonda jolıń bolar balam.

Jamanlarǵa sırıńdı aytpa,Kelgen jerde sózden qaytpa,Dostıńdı hasla muńaytpa,Dushpanıńdı mata, balam.

Malım bar dep asıp-taspa,Birewler menen jarıspa,Orınsız jerge tarıspa,Retinde sóyle, balam.

Kópti qasıńnan qashırma,Barıńdı joq dep jasırma,Quwlıqtı qalep asırma,Álipayım bolǵıl balam.

Jaqsılıǵıńdı xalıq bilsin,Durıslıǵıńdı aytıp júrsin,Mázi dushpanlar jek kórsin,Tuwrı joldan júrgil balam.

Orınsız jerge umtılma,Birewge jónsiz jutınba,Eki ret ótirik aytpa,Haǵına júr bárha, balam.

Oylanbastıń túbi oyran,Aqırı bir kún bolar hayran,Teńiń menen salǵıl sayran,Námárt penen júrme balam.

Basıńdı qos jaqsı dosqa,Dos tappay hám júrme bosqa,Qasıńa kelmesin shoshqa,Sonnan aman bolǵıl, balam.

Qasıńa erse bir jaman,Zıyanáti tiyer saǵan,Sondaylardan bolǵıl aman,Ańlastırıp qara balam.

Atańnan pándi násiyat,Hámmeden de usı zıyat,Orınlı et-etpe uyat,Keynińdi oylap júrgil balam.

Jalǵızban dep jaltaqlama,Kóppen ǵoy dep taltaqlama,Jorta kúlip shaqaqlama,Orınlı is isle balam.

Jaman ushın túspe otqa,Sózge erip ketpe jatqa,Qıyanet oylama jurtqa,Ońarıńa jaqsı, balam.

Ata-anańdı qádirle,Ólgenińshe jaqsı sóyle,Mal tapsań torqaǵa bóle.Óserińe jaqsı balam.

Jetim kórseń qolıńdı ber,Aǵa bolsa, keynine er,Onsha bultıyıp bolma sher,Álipayım bolǵıl balam.

Ǵarip kórseń, aqılıńdı ayt,Ońlı bolsa, qasıńa tart,Ol da bolsa úlken murat,Onıdaǵı oyla, balam.

Aldında jatır biyik jar,Sonı assań, kóp dúnya mal...Atańniń sózin esińe al,Násiyattı boldım, balam.