Qıynalma

Ketken joq ákeńniń malı,Qıynalma, Sayım, qıynalma.Atıńnıń ketken joq jalı,Qıynalma, Sayım, qıynalma.

Atıń seniń molla Sayım,Qırman paytı – seniń ǵayıń.Úsir, pitir bolar tayın,Ketken tonıńa qıynalma.

Erteń keler úsir, pitir,Nesibeńe etkil shúkir,Dúnya keler salsań zikir,Ketken tonıńa qıynalma.

Joyılıptı jalǵız tonıń,Sonı aytıp qızdı jonıń,Erteń ornı tolar onıń,Ketken tonıńa qıynalma.

Keler erteń teri-tersekBir áwlákper bolar isek,Joyılsa istipara kesek,Oǵan, molleke, qıynalma.

Istipara kesek joyıldı,Izlep kózleriń oyıldı,Qay mańlayshaǵa qoyıldı,Tabılar erteń, qıynalma.

Qara maǵan kózińdi ashıp,Otır nege ańıń qashıp,Bunshama degbirden sasıp,Jalǵız tonıńa qıynalma.

Jurttan alarsań qudayı,Kórer kúniń sol udayı,Málim ǵoy mollanıń jayı,Góne tonıńa qıynalma.