Múyten elleri

Doslar, tárip etsem múyten ellerim,Sharўaǵa jay, shóbi otlaq jerleri,Ahıw-toǵın bildirmeydi kólleri,Múytenniń balıqlı teńizi bardı.

Bekire sazan ushın awları bardı,Qast etken kisige dawları bardı,Kún ortadan munarlanıp kóringen,Múytenniń Terbenbes tawları bardı.

Sawıtbaydıń ján-jaǵası samattı,Balıǵınan awqatları abattı,Qız-jigittiń shaynaǵanı nabattı,Múytenniń abadan elleri bardi.

Mollaları aytar bes waq azanın,Juwıstırıp asıp qoyar qazanın,Barsa alar kóldiń sarı sazanın,Múytenniń jıranlı jılımı bardı.

Sharўa xalqı teńiz boyın jaǵalar,Jerleri bay, otlaq jerin saǵalar,Múyten menen bás tutpańız, aǵalar,Múytenniń Baymambet pirleri bardı.

Jılўa menen janıńdı alǵan kózleri,Shekerden shiyrindur aytqan sózleri,On tórt kúnlik aydan zıyat júzleri,Múytenniń ne jaman qızları bardı.

Aytar jerde ádepsiz sóz aytpaǵan,Tuwrı sóz kelgende tilin tartpaǵan,Qasarıssa xan hám biyden qaytpaǵanMúytenniń Biysenbay sherleri bardı.

Qatını balıǵın qaqlaydı duzǵa,Tapsırıp úylerin baqtashı qızǵa,Qorıqpastan minedi bir eli muzǵa,Sonıńday jigitler múytende bardı.

Talap eter bir-birine jarısıp,Intimaqlı barımına barısıp,Músápir adamǵa bárha qarasıp,Múytenniń el baǵar jigiti bardı.

Túrkstannan kelip teńiz jaylaǵan,Jelli kúni qorıqpay qayıq aydaǵan,Kól jaǵalap, eldiń ǵamın oylaǵan,Aqıllı jigitler múytende bardı.

Esitken bul sózden tappaydı qıyaw,Kemeli júredi, júrmeydi jayaw,Qolında eskegi, úsh qulash tayaw,Múytenniń kemeli jigiti bardı.

Atım Berdimurat, allanıń qulı,Ómirinshe sahrada ósken búlbili,Sózimniń bolmaslar ǵaletiy jeri,Meniń aytqan sózim hár jerde bardı.