Altı qız minip arbaǵa,Azıq salıptı dorbaǵa,Haytıw-mereke barmaǵa,Qızlar talap etken eken.
Eń úlkeni meniń dayım,Atın sorasań Biybayım.Sárdar jeńgesi Gúlayım,Bul da arbaǵa mingen eken.
Ekinshi qızı Máhiyda,Aq júzi aydap zıyada,Jol júrmeymiz dep pıyada,At arbaǵa mingen eken.
Úshinshi qızı Arıwxan,Kórgenlerdiń miyri qanǵan,Onıń jeńgesi Gúlimxan,Bul da arbaǵa mingen eken.
Atları shıqqan hár qashan,Qaraqalpaq haslın sorań,Besinshi qızı Ráwshan,Ol da arbaǵa mingen eken.
— Berdaq - Tańlamalı shıǵarmalarınıń jıynaǵı
Arba aydaǵan Qosımbet taz,Eserlikte aqılı az,Qahárli suwıq bolıp jaz,Qızlar menen ketken eken.
Qısılısqan soń hámmesi,Qızlardıń tiyip mámmesi,Hákeri tazdıń dámesiShul qızlardan bolǵan eken.
Jaman arba barıp qaytıp,Qızlardı biyjay qozǵaltıp,Hákeri taz qosıq aytıp,Jolsız júrip ketken eken.
Tazdıń málim minez qulqı,Dártti qozǵar neshe jılǵı,Sondaǵı aytqan qosıǵı,Xalıq awzında qalǵan eken:
-"Meniń ózim erke bolsam,Qız jamılǵan kórpe bolsam,Kórpedegi búrge bolsam,Aq siyneńde turmaspedim?
Meniń ózim torqa bolsam,Suw shaypalmas jorǵa bolsam,Qızlar salǵan sırǵa bolsam,Qulaǵıńda turmaspedim?
Meniń ózim kiyik bolsam,Hámme tawdan biyik bolsam,Qız iyirgen iyik bolsam,Tusaqanda turmaspedim?
Meniń ózim ılaq bolsam,Tawdan aqqan bulaq bolsam,Qızlar kiygen tumaq bolsam,Tas tóbeńde turmaspedim?
Meniń ózim ashıq bolsam,Ishim tolǵan qosıq bolsam,Qızlar ishken qasıq bolsam,Lábgeneńde turmaspedim?
Meniń ózim patsha bolsam,Puxaraǵa jar saldırsam,Qasıma qırq qız aldırsam,Xiyўa xanday bolmaspedim?
Olar da qansa oyınıma,Qolların salsa moyınıma,Qırqqızdı alıp qoynıma,Qushıp-súyip jatpaspedim?..."
Qızlardıń alıp mazasın,Hákeri taz tıǵıp basın,Jónli aydamay arbasın,Jolsız júrip ketken eken.
Qamshını urıp yabıǵa,Aldı túsip ketti oyǵa,Úsh qulash góne quyıǵa,Arba túsip ketken eken.
Bul quyı kútá tar eken,Eki jaǵası jar eken,Ishinde peri bar eken,Aqıl-huwshın alǵan eken.
Qudıq belinen kómilip,Túsken kesek basın bólip,Ármanlıqta qızlar ólip,Shul quyıda qalǵan eken.
Kimlerdiń ketip jesiri,Jigitshiliktiń háseri,Hákeri tazdıń kesiri,Shul qızlarǵa tiygen eken.