Oylanba

Jolıńnan qaytıp artıńa,Salıp kóp isti yadıńa,Qaranı tutıp aldıńa,Qarındasım, hesh oylanba.

Isenbe aǵa-jeńgege,Quwanba taqqan teńgege,Sırıńdı aytpa óńgege,Súymesiń ushın oylanba.

Qapa bolma, teńińdi izle,Xor bolmastay jerdi gózle,Jaman aytpa, jaqsı sózle,Haq iske heshbir oylanba.

Malı kóp dep ketpe oǵan,Azap berer aqmaq saǵan.Qostarım dep erme soǵan,Súygenińe ket, oylanba.

Kelip tur mınaw súygeniń,Áўelde kewil bergeniń,Kóz ashıp hámde kórgeniń,Sonıń ushın hesh oylanba.

Min artına búgin túnde,Jılap júrmey kúnde-kúnde,Usılay oylap turman men de,Keter bolsań hesh oylanba.

Qarama bergen malına,Qaramas ol hal-jayıńa,Ílayıq ba bul boyıńa?Súygenińe ket, oylanba.

Záńgińdi ózim basayın,Dushpan júregin osayın,Súygen yarıńa qosayın,Kel qarındas, hesh oylanba.

Qolındı ber de, berman júr,Oyıńa alma jat pikir,Qosılıp uzaq ómir súr,Min artına, hesh oylanba!