Qalay-qalay boldı zaman,Kúnnen-kúnge boldı jaman,Qapladı kún júzin duman,Bendege óziń pana ber.
Sıran boldı, úrgin úrdi,Kóz kórmedi qara jerdi,Námártler jeńip tur erdi,Bir alla, óziń pana ber.
Pana bergil qadir quda,Shiyrin janım bolsın pidá,Kúnnen-kúnge boldıq geda,Bizdey sorlıǵa pana ber.
Zaman túnek zaman boldı,Zaman emes, duman boldı,Dumannan da jaman boldı,Bendege óziń pana ber.
Bende edik shúphásiz haq,Bizdey sorlıǵa bergil baq,Posar boldı ayaqtan xalıq,Jalańaslarǵa pana ber.
— Berdaq - Tańlamalı shıǵarmalarınıń jıynaǵı
Bárshe qırdan asar boldı,Shólistandı basar boldı,Qaraqalpaq posar boldı,Xalıqqa aqıl-dana ber.
Qanatınan qayrılǵan bar,Jarım jolda shoyırılǵan bar,Doynaǵınan mayrılǵan bar,Olarǵa óziń pana ber.
Birew júr tamaq tabalmay,Ashlıqqa ilaj qılalmay,Eńbek haqısın ala almay,Óziń solarǵa pana ber.
Birewler bar ash qarını,Tartıp ap zalım barını,Tapbay basalay tarını,Solarǵa óziń pana ber.
Birazlar júr molla bolıp,Awzında bárha olla bolıp,Til ushında alla bolıp,Sondaylarǵa jaza ber.
Birazlar júr suwpı bolıp,Kewiline piker tolıp,Birazlar júr gúldey solıp,Solarǵa endi pana ber.
Aldımdı bayqap kórerge,Teń-qurbı menen júrerge,Ǵáriplerge qol bererge,Men sorlıǵa dáramat ber.
Joqtıń isi árman menen,Bardıń isi párman menen,Qayǵı-hásiret ǵam menen,Ótti ómirim, pana ber.
Jetpiske hám keldi jasım,Kúyikten aǵardı shashım,Ne sawdaǵa tústi basım,Menday sorlıǵa pana ber!