Meniń

Bul dúnyaǵa kelgeli,Boldı ma aytqanım meniń?Es-aqılımdı bilgeli,Bar ma kórmegenim meniń?

Qalem alıp xatlar jazdım,Qayǵıdan júdedim, azdım,Júzden júyrik mıńnan ozdım,Az emes bilgenim meniń.

Bir kámiyne talıp-ilim,Ózimde joq asa bilim,Táńirim bergen tókpe tilim,Tóger kewlimdegi meniń.

Kórer ǵarip júz mıń hazar,Berdimurat daǵın jazar,Sóz ańbaslar salmas názer,Sózlerdi tıńlap meniń.

Ǵamlı kewlim sheger nala,Zalım jábirinen sat para,Haqtıń hámirine ne shara,Úger ústiqanım meniń.

Merekede opaq boldım,Eńgezerdey sopaq boldım,Kólge barsam, qopaq boldım,Aўım maylamadı meniń.

Tıńlap, jurtlarım, nayleyin,Tilimdi tartıp sóyleyin,Bul zamanǵa men ne deyin,Aytqanım bolmasdur meniń.

Men allaǵa dad etermen,Kámbil pirdi yad etermen,Ótirik aytıp, netermen,Kewlimde ármanım meniń.

Oylanıń endi, xalayıq,Usı ma bizge ılayıq?Bárimiz bir is qılayıq,Sózimdi tıńlasań meniń.

Basıma tústi qıyamet,Bul zaman boldı álamat,Joq shıǵarlar saw-salamat,Barlıǵı oyımda meniń.

Jaqsınıń gúli solmasın,Qaza jetpesin-ólmesin,Ǵaripke jábir kelmesin,Ólgenshe niyetim meniń.

Kúnxojanı taqıyıq kórdim,Ájiniyaz benen bir júrdim,Aytqanına qulaq túrdim,Irikpedi sózimdi meniń.

Haq jolına belim baǵlap,Qara baǵrım turman daǵlap,Júre almadım bes kún shaǵlap,Barlıǵı oyimda meniń?