Bir jigitke

Ózi bolǵan ǵoshshaq jigit,Qattı ketip barasań sen.Bizden sizge pándi úgit,Zeyin salıp qarasań sen.

Shapqanda baydıń ulısań,Toqtaǵanda bir pulısań,Ózińshe Xiyўa xanısań,Puxarańbız sorasań sen...

Batır jigit elin baǵar,Qasqaldaq hám kólin baǵar,Qatınlardıń jolın baǵar,Sendey jigit, qarasam men.

Óytip, inim, qattı qashpa,Nar buwraday kóbik shashpa,Bir kún murnıń tiyer tasqa,Qattı uyatqa qalasań sen.

Baylıǵım bar dep buwsanba,Dúnya jetkizbes quwsań da,Atadan altaw tuwsań da,Watanıńa darasań sen.

Berdaq aytar, jassınǵanday,Áўmetiń joq assınǵanday,Baqsı aǵańdı bassınǵanday,Inim ele balasań sen!