Birew menen joldas bolsań,Shıǵıs jaǵını bilgeysiz.Sapar shıǵıp hámdam bolsań,Sırı-halını bilgeysiz.
Haq jolında sabır etip,Dushpanlarǵa jábir etip,Talabıńa ıqlas etip,Bolajaǵını bilgeysiz.
Hayal alsań, jaqsını al,Kóp tıńlap sózge qulaq sal,Kórkin alma, minezin al,Áўelden sınap kórgeysiz.
Haslı kárim qara meniń,Júrek bawırım para meniń,Kewlim tolı jara meniń,Bul gáptiń parqın bilgeysiz.
Ber degende dostıńa ber,Dushpandı etip qara jer,Haslan qayqayıp bolma sher,Násiyatımdı ilgeysiz.
— Berdaq - Tańlamalı shıǵarmalarınıń jıynaǵı
Jigit qanatı at bolar,At jigitke quwat bolar,Ólgenshe waqtı shad bolar,Alarnıń parqın bilgeysiz.
Aǵa begler jasım orta,Aytqanım joq sózdi jorta,Isimde bolmaǵay qata,Sózimniń parqın bilgeysiz.
Aǵalar, men shayır boldım,Gúl edim, quwradım soldım,Shıǵıp dúnyaǵa ne kórdim?Ahıw-zarımdı bilgeysiz.