Xalıq ushın

Jigit bolsań arıslanday tuwılǵan,Xızmet etkil udayına xalıq ushın,Jigit bolsa arıslanday tuwılǵan,Hesh qashan da jumıs etpes ózi ushın.

Ózi ushın is eter aqılǵa zayıl,Bolıp usınıńday zamanǵa qayıl,El qıdırǵan qıdırımpaz gil sayılJumıs etpes hesh waqıtta xalıq ushın.

Zalımlar tıńlamas móhminniń zarın,Olar oylar ózleriniń ońarın,Hesh waqıtta zalım qolında barınJaratpaslar bar bolsa da xalıq ushın.

Jeterseń muratqa xızmetler etseń,Elatıń siltese ǵayrı elge ketseń,Dushpannıń hárqashan basına jetseń,Ayanbaǵıl xızmetińdi xalıq ushin.

Berdimurat, oylap aytqıl sózińdi,Kóterme lap urıp, tekte ózińdi,Qızartpaǵay xalqıń seniń júzińdi,Qoldan kelse xızmet etkil el ushın.

Jigit bolar jigit adam ertedi,Aytqan sózin paldan sheker etedi,Aytsa bir sóz ıqrarına jetedi,Soǵan megzes xızmet eter xalıq ushın.

Oyshıl jaqsı jigit bilimpaz keler,Aytqan gáplerine túsimpaz keler,Aqılsızdıń qásiyeti az keler,Aqmaqlar hesh xızmet etpes xalıq ushın.

Aqıl adam sózler ertpes izine,Shóp salmas yarınıń hárgiz kózine,Baqmas námáhremniń hasla júzine,Shular xızmet eter bárha xalıq ushın.

Ermes jaqsı pasıqlardıń sózine,Kóp berilmes óz basınıń házine,Ǵayrat berip ólgeninshe ózine,Xızmet eter mudam ullı xalıq ushın.

Jaqsınıń úyine adam kóp keler,Jaman bolsa onıń kózi jep keler,Qurı tili menen "aǵa" – dep keler,Bular xızmet etpes heshўaq xalıq ushın.

Jaqsı adam dushpanların kúldirmes,Qoldan kelse ańa dáwran súrdirmes,Bóri arıǵın hesh waqıtta bildirmes,Sol jigittiń janı qurban xalıq ushın.

Isińde jigitler qamlıq bolmasın,Ǵumshalansa gúliń hárgiz solmasın,Bilek kúshli bolıp áliń talmasın,Xızmet áyle qolınızda bar ushın.

Doslıq penen hár bir iske taq tursań,Jan ayamay el-jurt ushın is qılsań,Qayǵılanbay ullı iske qol ursań,Sonda meniń kewlim piter xalıq ushın.

Ǵosh jigittiń mádet bolsa elatı,Hesh waqıtta kemlik qılmas quwatı,Izinde qaladı jigittiń atı,Qalıs xızmet etse eger xalıq ushın.

Bul zamanda jábiriw-japa shegermen,Qara kózden qanlı jaslar tógermenZalımlardıń jábirin aytıp sógermen,Kúygenlikten jan qıynalar xalıq ushın.

Bolmadı bir darqan mánzil mákanım,Záhár-zaqqım boldı iship-jegenim,Bolmadı aytsam da meniń degenimÓlgenshe aytarman sózdi xalıq ushın.

Ájel jetip ólsem bul kúnde ózim,Keynimde qalarlar táriyp bop sózim,Kórdi birneshsheni tirimde kózim,Parqın bilgen xızmet eter el ushın.

Berdimurat tıńlap sózińdi kórgil,Júrgen soqpaǵıńnan izińdi kórgil,Ǵamgún shekpe, ǵariplerge qol bergil,Sonda is etkeniń móhminler ushın.

Kórseń qaytarmaǵıl dostıń názerin,Qoldan kelse, qurǵıl shadlıq bazarın,Ótkermegil dosqa gáptiń hazarın,Doslar xızmet eter yaranı ushın.

Dushpanlardı bul zamanda zor ettiń,Sol sebepli bizlerdeydi xor ettiń,Iyshanlardıń birazların urı ettiń,Onıń zardapları zıyan xalıq ushın.

Kewlim haqqa jılap táwekel etkil,Úrgenishti qoyǵıl, Mısırǵa ketkil,Kewilge muwapıq bárha is etkil,Anda seniń oyıń bárha el ushın.

Jamanlar qasınan qońsı kóshirer,Óziniń dedikli antın ishirer,Jaqsı adam bolsa giyne keshirer,Sonda rawajlanar kewliń el ushın.

Jaman adam bilmes gápiniń parqın,Bárqulla jamanlar aǵayin-xalqın,Kóteremen deyip óziniń dańqın,Udayina zıyan eter xalıq ushın.

Jaqsı adam sóz mánisin ańlaydı,Jaman adam pasıq sózdi tıńlaydı,Aytsań hárgiz aqılıńdı almaydı,Kewlim meniń wayran bolar sol ushın.

Jaqsı adam jaǵar shiyrin janıńa,Jaman adam boyar qızıl qanıńa.Kóz salarlar seniń jegen nanıńa,Jaman adam sonday bolar peyli ushın.

Dushpannan ǵaplette tappadım sawa,Qurǵaq sózdi aytıp, demeńler "awa",Jas úlkenlerińnen alıńlar duwa,Paydası bolar ma ǵárip el ushın.

Er jigittiń atın hayal shıǵarar,Jamanı sezilse jigit ne qılar?Jaman jolda jaman sırın aldırar,Olardıń keregi bolmas xalıq ushın.

Jamannan ul tuwsa ataǵa tartar,Kún sanap gázzaplıq qısleti artar,Xalıqqa jaqpas, kesapatlı jol tutar,Ondaydıń paydası bolmas xalıq ushın.

Sóyle Berdimurat, sózleme yalǵan,Bul dúnya uzaq jol atańnan qalǵan,Jaqsı júrer bul zamanda aqıl alǵan,Jaqsılar xızmetin etpes ózi ushın.

Oylansam sóz keler izme-iz ózi,Ózi emes dúzeter adamnıń tezi,Joyılmas jaqsınıń aytqan hár sózi,Kewilim bárjay tabar aytsam sol ushın.

Shayır edim, kózim kórgenin jazdım,Kókiregimniń sezip bilgenin jazdım,Zaman qısletinen sarǵaydım-azdım,Bolar ma dep jaqtı kúnler xalıq ushın.

Atım Berdimurat, men haqtıń qulı,Sahrada sayraǵan sháyda búlbili,On gúlinen ashılmadı bir gúli,Degenine jete almadı xalıq ushın.