Maǵan ber

Bársheni yaratqan qadir qudayım,Berseń bul bendeńe haqlıq jolın ber,Igri júrsem artar meniń gúnayım,Bul qalbime tuwrılıqtıń nurın ber.

Pálek gárdishinen etsem shikayat,Tıńlaǵanǵa hásiretli bir hikayat,Jábri-japam bolıp tur biynihayat,Zibanıma ádalatlıq húkmin ber.

Ázel ámiri bilán dúnyaǵa keldim,Qadir bolıp jaqsı-jamandı bildim,Qayǵı-álem bilán bawrımdı tildim,Qutılayın, bul qayǵınıń emin ber.

Bay dáwletin bergil, biyǵam jasayın,Nesiybe ırısqımdı moldan asayın,Ármansız oynayın, súyip qushayın,Maǵan dúnya jánnetiniń húrin ber.

Bir dem etken maǵrıp-mashrıq arasın,Pıraq ber, kúnime meniń jarasıń,Jahan maǵan háwes etip qarasın,Házireti YUsuptiń husni kórkin ber.

Ústinen jol berse ne teńiz-dárya,Meni tozdırmasa ne zaman giriya,Mıń jıldan soń qanday boladı dúnya?Kóreyin, Luqmannıń uzaq ómirin ber.

Bostan ber, gúlleri átir anqısın,Arasında el sayranlap shalqısın,Qolımda som temir ottay balqısın,Temirshi házireti Dawıt sehrin ber.

Dúnyada tilsimler sırın ashpaǵa,Ráfrad minip, jerden kókke ushpaǵaDushpandı óz zindanına baspaǵa,Jer-kóktegi Súláymannıń hámrin ber.

Jahan gáziynesin alsam qolıma,Sari aylemek ushın haqlıq jolına,Berdimurat kibi haqtıń qulına,Táńrim, sahawatlı ana mehrin ber.

Túrkstan, Xorezm máskanım meniń,Bes qala, teńizdiń átirapı elim,Ayshı-áshiret, arzıw áyleydi kewlim,Maǵan da dáwletli insan ómirin ber.

Berdaq der, sózimdi aytıp keteyin,Baq bolmasa xor ómirdi neteyin,Bolmasa dúnyanı qarap eteyin,Qane, maǵan Israpıldıń súrin ber!