Kók gúmbezin boylap dizilgen ǵazlar,Zeynińdi ashar ǵańqıldasqan hawazlar,Gózzal báhárimnen ákelgen xabar,Jılwa nazım menen yar-yar aytayın.
Quldıraǵan qızıl suwlı tolqınlar,Náwbáhárden shólge jollar tartıńlar,Yar eline máwij urıp burqıńlar,Sáwer yarım menen yar-yar aytayın.
Muhabbat qıyalı júrekte xatlar,Jaslıqtıń júregi sharıq urıp shaǵlar,Qulpırsın-gúllesin yar júrgen baǵlar,Xosh hawazım menen yar-yar aytayın.
Doslıq-birlik muhabbattıń kámalı,Mehribanlıq millionlardıń mádarı,Jáhánge nurlı tań jaslıq samalı,Shadlı sazım menen yar-yar aytayın.
— XX ásir qaraqalpaq poeziyası antologiyası