Bıltırǵıdan bıyıl jaman,Qalay-qalay boldı zaman,Ǵarip-qaser qalmay aman,On tilladan keldi salıq.
Bunı saldı Nurımbet jan,Buyırdı dep atalıq, xan,Xalıq possın dep neshshe san,On tilladan keldi salıq.
Maǵan hesh gáp eshegim bar,Satıp berermen bir bazar,Atteń, jarlı ash Ernazar,Oǵan qıyın boldı salıq.
Ol paqırdıń nársesi joq,Emesdaǵı qarını toq,Hadalǵa bir tawıǵı joq,Albırattı onı salıq.
Úyinde bar jetim ballar,Qazanǵa túskendey janlar.Kózden aqtı qanlı jaslar,Júdá qıyın boldı salıq.
— Berdaq - Tańlamalı shıǵarmalarınıń jıynaǵı
Mór uslaǵan Bahawatdiyin,Bizlerde joq qara tiyin,Gileń ashqa boldı qıyın,Júdá awır boldı salıq.
Anaw júrgen Palım laqqı,Elde barday onıń haqqı,Berer edim oǵan dákki,Hal-dármandı qurttı salıq.
Anaw júrgeni Elmurat,Astında jaman ala at,Oǵan ne degen saltanat!Kisi qunı boldı salıq.
Anaw bolıs murtın tawlap,Adamlardı ańday awlap,Ash xalıqtı bárha jawlap,Dimarımdı qurttı salıq.
Anaw otır Qulımbet bay,Tayar aldında appaq may,Ash xalıq júr tabalmay jay,Dóhmet boldı usı salıq.
Óndiredi ash xalıqtan,Jetim jılaydı sonlıqtan,Bay aman qaldı salıqtan,Dóhmet tólew boldı salıq.
Anaw meshit munarlanǵan,Baslarında shıraq janǵan,Quran ashıp xalıqtı sorǵan,Iyshanlarǵa joqdur salıq.
Aq úzikli úlken otaw,Óz aldına bolıp ataw,Erman axun otır anaw,Oǵandaǵı joqdur salıq
Anaw júrgen Pirim sholaq,Etip júr ol jalaq-julaq,Salıq dese tayar sol aq,Bizler ushın qıyın salıq.
Waqtım ótti qayǵı menen,Jasım ayrılmay kózimnen,Sorasańız bunı mennen,Usılayınsha boldı salıq.