Uzaq jolǵa sapar júrip,Jolda dármanım qalmadı,Dúnyanıń mehnetim kórip,Tánde mádarım qalmadı.
Dúnya ráhátin kórmedim,Shalqıp shad bolıp júrmedim,Ház etip dáwran súrmedim,Maǵan mádetkar bolmadı.
Qazan urıp, gúlim solıp,Túrli-túrli zaman bolıp,Ǵarip-qaser kewlin alıp,Biyde shápáát bolmadı.
Bul zamannıń iyshan, bayı,Joldan júrmeydi binayı,Qaradan kópdur gúnayı,Sháriyat jolı bolmadı.
Jaqsılar jamandı tekler,Jamanlar bir gápti kekler,Shahzadalar, begiw-beglerÁdalatlıq is qılmadı.
— Berdaq - Tańlamalı shıǵarmalarınıń jıynaǵı
Patsha bolsa ádalatlıq,Hám qayırıw-saqawatlıq,Hatamtaylarday hatamlıq,Bay bátshelerde bolmadı.
Xorezmde asqan júyrik,Ushqan qus hám qulan-kiyik,Atların aytıp keteyik,Jiyrenshe shenli bolmadı.
Molla bolsań ilimdi tut,Jalǵız óziń bolmaysań jurt,Káspi-káriń seniń jádut,Duwrı birewiń bolmadı.
Men ózim bilgir emespen,Asqan danaman demespen,Heshўaq jalǵan sóylemespen,Jalǵan gáp aytqan bolmadı.
Birewler baybatshe boldı,Birewler, qazı, biy boldı,Xoja-seyit burıq boldı,Duwrı birewi bolmadı.
Kewlimniń sol intahası,Bar ma dúnyanıń opası,Bárshesi adam balası,Minez-qulqı bir bolmadı.
Ay yaranlar, etpeń zina,Túwesilmes bolar gúna,Ol kábańdur ata-ana,Onnan uluǵ zat bolmadı.
Júrek bawrını daǵlasa,Ózi ushın bel baǵlasa,Jarlı biyshara yıǵlasa,Baydan shápáát bolmadı.
Jıl-jıldan zaman tarıldı,Zardabınan jer jarıldı,Bul azaptan kim arıldı?Heshbir payanı bolmadı.
Sózim meniń málim kópke.Shıǵarmas oqıǵan shepke,Túsinbese usı gápke,Shul waqıya az bolmadı.
Ya bolmasa gúz keler me,Ya bolmasa qıs keler me,Jayma shuwaq jaz keler me,Onı bilgenler bolmadı.
Kemtarlıqtıń kamalı joq,Men sorlınıń hamalı joq,Shalqıp aytar zamanı joq,Jaynap-jasnar kún bolmadı.