Sen muhabbattı, men tańdı kórdim,Men qosıǵımdı, sen shashın órdiń,Sen zawıq shashtıń, men táshwish terdim,Sáwgi — laplama otına salsın!
Men janǵan Quyash, sen appaq Aysań,Biz kámbaǵal, sen húsinge baysań,Biyshara kewlim, nege jılaysań?Yar dep ilaya júregim talsın!
Men hayran uya, sen baxıt qusı,Men gúrsinis..Sen shadlıq kúlkisi,Nıshana bolıp júregim tusı,Ishqıń tıyıǵı, kóksimde qalsın!
Sen sózi shiyrin, sen qálem qassań,Men nárwan talday, sen narttay jassań,Shashıń dar bolǵay — sen meni assań,Jállat kózleriń janımdı alsın!
— XX ásir qaraqalpaq poeziyası antologiyası