1948–
Keńesbay Karimov — shayır.
K. Karimov 1948-jılı 27-avgustta Shımbay rayonındaǵı Shımbay xojalıǵında tuwılǵan.
Ol orta mektepti pitkerip “Sovet Qaraqalpaqstanı” gazetasında xabarshı (1967-68), áskeriy xızmette (1968-70) boladı. 1975-jılı Qaraqalpaq mámleketlik pedinstitutın tamamlap, “Jas Lenińshi” gazetasında (1976-83), “Qaraqalpaqstan” baspasında, televidenie hám radio esittiriw komitetinde, “Ámiwdárya” jurnalında, Qaraqalpaqstan mámleketlik teleradio kompaniyasında juwaplı xızmetlerde isleydi. Sońınan “Erkin Qaraqalpaqstan” hám “Vesti Qaraqalpaqstana” gazetasınıń Bas redaktorı bolıp isledi. 2011-jıldan Qaraqalpaqstan Respublikası Jazıwshılar Aўqamınıń baslıǵı lawazımında islep atır.
Shayırdıń dáslepki qosıqları 60-jıllardıń ortalarında járiyalandı. Onıń “Aralıqlar” (1980), “Waqıt minarası” (1982), “Umıtılǵan yarım ay” (1984), “Meniń terezelerim” (1985), “Araldan keldim” (1985), “Kóndim múlki” (2005) degen poeziyalıq toplamları basılıp shıqtı. K. Karimovtıń balalarǵa arnalǵan “Altın tenge”, “Arıq mergen” pesaları jas tamashageyler teatırınıń sahnasında qoyıldı.
Ol A.S. Pushkinniń, A. Bloktıń, Saadiydin shıǵarmaların qaraqalpaq tiline awdardı.
K. Karimov Qaraqalpaqstan Respublikası Joqarǵı Keńesiniń Húrmet jarlıǵı menen sıylıqlanǵan. «Qaraqalpaqstan Respublikasına miyneti sińgen jurnalist», Qaraqalpaqstan Respublikası Joqarǵı Keńesiniń deputatı.
K. Karimov 1983-jıldan Jazıwshılar awqamınıń aǵzası.