Kewil kewilden suw isher

Kiyikler suw isher saydan,Ǵaz-úyrek kólden suw isher.Al, adamnıń kewli qaydan?Kewil kewilden suw isher.

Kórdim aq quw oyınların,Uykelesip moyınların,Saǵınǵanday ashıq yarın,Kewil kewilden suw isher.

Atlar gúldir-gúldir kisnep,Sharq urar úyirin izlep,Qoy mańırap, bota bozlap,Kewil kewilden suw isher.

Dáryalar teńizge ashıq,Asıǵar máwjirip tasıp,Jollar jollarǵa ulasıp,Kewil kewilden suw isher.

Doslıq, izzet — ullı dáwlet,Jan azıǵı — jaqsı sáwbet,Shólge — báhár, gúlge náwbet,Kewil kewilden suw isher.

Aspanǵa ser salıp baqsań,Juldızlar sóyleser aqsham,Óziń bulaq bolıp aqsań,Kewil kewilden suw isher.

Júrek sháwkildep tursın-dá!Dúnyanıń qaysı burshında,Jasap tursaq ta, durısında —Kewil kewilden suw isher.

Alıstaǵı asqar tawlar,Biri-birin kórmek bolar,Sol ushın da biyik olar,Kewil kewilden suw isher.

Serle, háy insan balası!Jamandur kewil alası,Adam adamnıń quyashı,Kewil kewilden suw isher.