Búlbil toyına

Sáhár turıp shıqsam Ámiw boyına,Gúller ǵumshalanıp kúldi, Ayımxan.Óner saxnasınıń shadlı toyında,Hawazıń súysintti eldi Ayımxan.

Qayǵıdan qamıqqan jawdır kóz ediń,Qońıratlı qarapayım qız ediń.Árman aspanında bir juldız ediń,Tań shuǵlası menen tuwdıń Ayımxan.

Óner giltin shalıp ilgir zeynińe,Ǵaybarlanıp, hesh aylanbay keynińe,Oraypekti qaǵıp taslap iynińe,Silkinip saxnaǵa shıqtıń Ayımxan.

Kóp kústanı qılıp, seni kóre almay,«Artist» dep biypámler kúlisken talay.Qaldı sol ósekler gúwlep samalday,Mártebe tawına mindiń Ayımxan.

Sazendeler sazlap qasıńda sazın,Dúnyaǵa taraldı azat hawazıń,Quslar talwas etse ilmegi lazım,Ónerdiń órmegin ildiń Ayımxan.

Sen sayraǵan waqta shadlı namanı,Gúldey jaynap jańa turmıs jamalı,Esip kewillerde sáwir samalı,Qıs toqsanlar jazǵa dóndi, Ayımxan.

Sestiń jańlaǵanda háwijge minip,Taslarǵa til piter ǵóyaǵa kelip,Keń saraylı zallar siltidey tınıp,Júrekler sháwkildep soǵar, Ayımxan.

Sensiz qızbas toy-tamasha seyiller,Jolıńa payandoz ráńbáreń gúller,Aldıńda albırap ǵoshshaq búlbiller,Kelip shańıraqqa qonar, Ayımxan.

Bir aytsań, «jáne» dep jurt etip talap,«Hay, saw bol jeńgelep» yaki «apalap»,Úrikken kepterdeyen dúrlep shapalaq,Saxnadan jibermes seni, Ayımxan.

Kórgen waqta tuwǵan ayday júzińdi,Xalqım tıńlaǵanda xosh hawazıńdı,Teatrlar tarta almay nazıńdı,Saxnalar sıqırlap turar, Ayımxan.

Dawısıń jaylap ózbek, túrkmen jurtların,Qıymıldattıń kóp jigittiń murtların.Qaraqalpaqtıń kókirektegi qurtlarınNawqanday órgizer sestiń, Ayımxan,

Shıqsań jawlıǵıńdı sen qıya salıp.Jurttıń shapalaqtan qolları talıp.Qayta bastan góne dárti qozǵalıp,Ǵarrılar jaslıǵın esler. Ayımxan.

Xalıq bahalap xızmetińdi úlgili,Óńirine taqtı húrmet belgini.Ámiw boylarınıń sháyda búlbili,Toy múbárek bolsın, jeńge Ayımxan!