Gesirtkeniń kózleri

Zaman jup ay bergen dalama meniń, -Jup nurlı kózinen júk mashinanıń.Kórdim men kózlerin bir gesirtkenińTunjırap sol nurǵa shaǵılısqanın.

Aysız túnde jol boyında nábada,Bul kózlerge kóziń túskeni barma?Bir periwza qaslı júzik daladaTúsip qalǵan yańlı shaǵılısar farga.

Jasımda bul kózler aqsham janǵanda,Onnan bir suwıq, jat sáwle sezgenmen.Soń bir ot basında dúzde qonǵanda,Shól tilsimin kórdim usı kózden men...

Ilim úńilmegen sol biyik jaqtan,Jerge bir jup juldız muńlı baqqanday.Iyneniń kózindey eki sańlaqtanTereń sırlı kók nur qaynap atqanday.

Tereń sırlı kók nur... O, saqıy dalam!Ot basında geologlar sol gezleriSeni maqtaǵanda, kóringen maǵanTek sol gesirtkeniń sırlı kózleri.

Endi kór! Biz qonǵan shatır joq bunda.Gaz qalası dúzge hújimin baslar.Shólden ólgen seksewiller ornındaJelpir kóshelerdi jas qaraǵashlar.

Sheksiz shól teńizi mayak jaqqanday,Kompressor turar nurlanıp mudam.Juldız jerge túsip túnep atqayday.Juldızǵa qonaqqa ketkendey adam.

Dóńbekshir jaqtıda uyıqlap kórmegenQatal shól táńirisi - jabayı dala:«Kimler bular aybınıwdı bilmegen,Sahraǵa baǵ egip, ornatqan qala?!»

Dúzdi dúsirletip poezdlar barar.Jas qala shıraǵın jaqqan gezleri,Kosmoslık kógildir ot penen janarGesirtkeniń periwzalı kózleri...