Abbaz shayırǵa Ukrainadan xat

Ukrainanıń jolı ájep jol eken,Qansha kóp júrseń de júrmedim derseń.Izzet, húrmet, dos-yaranǵa tolı eken,Sirá biytanıs jan kórmedim derseń.

Bul jolda parq emes kóp penen azıń,Eski doslarıńday qurarsań bázim.Bul shadlı zamanda, áziyz ustazım,Júz dáwran súrseń de, súrmedim derseń.

Aldımda kóp eken kórmegen sıyım,Gúl berip qarsı aldı qanshama jıyın,Bul zamanda shayır bolmaqtan qıyınJumıs bar ma desem, «bilmedim» derseń.

Shayır dese esken samal tınǵanday,Keń zallardı kernep adam tolǵanday.Sonda «shayırman» degeniń jalǵanday,«Kóp eken xalqıma bermegim» derseń.

Shayır degen óz xalqınıń elshisi,Shad ómirden mol berilgen enshisi.Bola almasań hasıl sózdiń kánshisi,«Biykar bul májiliske kirmegim» derseń.

Ullı Kiev, ullı eldiń orayı,Lıqqa toldı mádeniyat sarayı.Quwanıshtan tolqıp, demim tarayıp,Turǵanımdı aytsam, «kórmedim» derseń.

Sonday waqta sen túserseń esime,Sózime sóz, kúsh qosılar kúshime.«Sóyle inim, albıraysań nesine?Lazım sóz marjanın termegiń» derseń.

Sonda xalqım kelgendey-aq janıma,Qızıw ener tamırdaǵı qanıma,Sol gezde shayırlıq okeanınaQayıqlı barıp - aq órledim derseń.

Sen bir tarlan túlep ushqan tawdaǵı,Biz palapan qonaqlaǵan jardaǵı.Qaraqalpaqtıń sen búgingi Berdaǵı,Qáytip «sóz marjanın termedim» derseń!

Dnepr boyınan atlanıp keshte,Biz baramız júyrik ekspresste.Seniń búlbilgóya hawazıń este,Qalaysha «yad etip júrmediń» derseń?

Sen otırsań qara taldıń astında,Maqbal tıslı eki kópshik dástińde,Qol bılǵasam «qara ayǵırdıń» ústinde,«Kózim girew tartıp kórmedim» derseń.

«Shayır kewli qartayıwdı bilmeydi,Ol bir aǵash, qısı-jazı gúlleydi»,Dep ǵarrı Derjavin aytıptı deydi,Desem, «bala, bul qay ermegiń?» derseń.

Shalqı, shayır, shalqıytuǵın gez keldi,Kewilge yosh, tilge shiyrin sóz keldi.Jigirmańda eliń jaynap ózgerdi,«Jasta búytip, dáwran súrmedim» derseń.

Mine, poezdımız Xarkovke jetti,Xalıq japırılıp bizge húrmet kórsetti.Burınǵı zamanda bunday izzettiBálki «túsimde de kórmedim» derseń.

Watanımız shadlı ómirdiń baǵı,Onda gúller poeziya daraǵı.Burqıp aqsın hasıl sózdiń bulaǵı,«Shalqısın shayırlıq órnegim» derseń.