TÚRK ULÍSINA

Túrk ulısı, qan qatıslı qardashım,Atıńdı baylayın júrek tórime.Sizler ushın qurban bolsın bul basım,Xosh kelipsiz, qaraqalpaq eline.

Ata jurtı Túrkstanǵa múnásip,Diydarımız bir-birewge jarasıp,Ǵárezsizlik sharapatı jol ashıp,Xosh kelipsiz, tuwısqanlar eline.

Jáhánge jayılǵan dańqı-sawlatı,Tonıkók hám Bilgeqaǵan zuryadı,Oǵuz, qıpshaq, qırǵızdıń márt áwladı,Xosh kelipsiz, qaraqalpaq eline.

Qorqıt ata qobızınan saz tıńlań,Jırawlardan eski dástan sóz tıńlań,Bul bir eden xalıqtıń júregin ańlań,Keliń, altın miyras dástan eline.

Xorezmshaxlarǵa qala bolǵan jer,Beruniy babamız bala bolǵan jer,Berdaq, Ajiniyazǵa ana bolǵan jer,Xosh kelipsiz, sol danalar eline.

Nawayı ǵázzelin, Fizuliy sózin,Maqtumqulını oqıp ashılǵan kózim,Abay, Toqtaǵuldı súyemen ózim,Aytsam, keltiremen gúlin-gıúline.

Túrk ǵardashım, dańqı jetken dúnyaǵa,Beglik inabatıń jurttan zıyada,Yunus Hámireń megzer búlbúlgóyaǵa,Xosh keldińiz, búlbúllerdiń eline.

Biziń qızlar Gúlayımnıń urpaǵı,Sulıwlıqta juldızlardıń sholpanı,Jigitleri ǵoshshaq, eldiń sultanı,Xosh kelipsiz, miymandoslar eline.

Qonaq — sultan bolsın, men — qul bolayın,Qatnasıqtıń aldı bolǵay ilayım,Janı pidá Ashıq Ayaz Ibrayım,Góruǵlıday miniń Gıyrat beline,Xosh kelipsiz, qaraqalpaq eline,«Qırıq qız»lardıń at oynatqan jerine…