ASHÍQ ASPAN

Ashıq aspan kibi kewil tap-taza,Júrekte girbiń joq, kókte de bult joq.Saǵınıshlı báhár, sálem shahzadam,Sálem, aydın sáhár, sálem Jaqsılıq,Ashıq aspan kibi kewil tap-taza.

Sálem, keń sahranıń boz torǵayları,Keń aspan ishinde qaǵıńız qanat.Samallar oyatıń torańǵılzardı,Búgin baslanbaqta jańa bir-hayat.Sálem, keń sahranıń boz torǵayları.

Sálem, nartsha tallar, jazǵan búrtigim,Erteńgi nárwannıń sen shiyrin janı.Mehrin tógip áne quyash qaradı,Jerdiń aspan bolıp turǵan ármanı,Sálem, nartsha tallar jazǵan búrtigim.

Sálem, áziz dostım atar tań jaqın,Taǵı Nawrız keldi kókte hám jerde.Kókjiyek qulpırar shaqmaq shaǵıp,Bir tolqıw tuwılar pikirde-oyda,Sálem, áziz dostım atar tań jaqın.

Ómir ótti deme ele jol uzaq,Ele quwanıshım jap-jasıl daraq,Qansha jıl shegirip tasladım biraq,Hár tańım ómirdiń mazmunın qurap,Ómir ótti deme ele jol uzaq.

Sálem, báhárimniń tańı-sáhári,Tınımsız gúressheń oylarım sálem,Báhár quwanıshı shaqmaq sıyaqlı,Málham bolıń meniń janıma hár dem,Sálem, báhárimniń tańı-sáhári.