Dáwran

Kelgensoń adam kóp jasqa,Qartayǵan soń bolar qasta,Gúńirtlenip kózim jasqa,Bul basımnan ótti dáwran.

Jigirma bes ótti jasım,Kemeydi qurbı-qurdasım,Qayǵıda boldı bul basım,Ármanlıqta ótti dáwran.

Meni salıp janǵan otqa,Kúydirip ókpemdi partqa,Kem tasladı bizdi artqa,Sóytip bizden ótti dáwran.

Bay bolmadım jıynap maldı,Biy bolmadım biylep eldi,Bári mennen ádira qaldı,Keregi joq onday dáwran.

Jutım boldı maǵan qıyın,Mal bolmadı jıyın-jıyın,Qayda maǵan bergen sıyıń?Kóp áwere ettiń, dáwran.

Bayǵa bardıń, baxıt boldıń,Sınbaytuǵın saxıt boldıń,Jónin taptıń qıysıq joldıń,Hárkimlerge kettiń, dáwran.

Jarlı kórseń jantaspaysań,Júgi awırǵa qoldasbaysań,Aqıl kórseń oylaspaysań,Aqılsız jorǵa dáwran.

Astımda pıraǵım eshek,Tósenerge hám joq tósek,Malı joqtı ettiń ósek,Kúlki qıldıń bizdi, dáwran.

Ata-anama kelmediń,Bizge mal-haldı bermediń,Qasıma meniń kelmediń,Bul basımnan óttiń dáwran.

Sen toyǵan bolsań, men de toq,Basımnan óttiń dúnya boq,Maǵan da sen keregiń joq,Qashsań jolıń bolsın, dáwran!