Bulqıysań súyiklim, zuwlap bulqıysań,Pamir tawlarınan bizge shulǵıysań.«Asaw Ámiw» dep aytadı tariyxta,Máwij urıp qısı-jazı tolqıysań.

Qaraqum, Qızılqum sheksiz shólistan,Suw bolmasa hár jer bolar zimistan.Sen Ámiw shóllerdi bólip óteseń,Boylarıńdı etip baǵı-gúlistan.

Ishkende suwıńdı miyrim qanadı,Shiyrin janım ráhátke toladı.Ámiwdárya quwatımsań, janımsań,Sen shalqısań, el shadlıqqa toladı.

Dártlerime dawa suwlarıń seniń,Eginge bólengen boylarıń seniń.Kewlimdi kóterip, zeynim ashadı,Sıńq-sıńqlasıp ushqan quwlarıń seniń.

Neshshe ásir boyı ǵarrı Ámiwseń,Neshshe batır perzentleriń bar bilseń.«Men Ámiw jigiti — dep tiyse jawǵa,Hárbirewi neshshe mıńǵa teń deyseń.

Bulqı janım, bulqı mudamı bulqı,Máwij ur qısı-jaz hallasla, tolqı.Ámiwim dep quslar sayrar baǵlarda,Shad bolsın boyıńda elimniń xalqı.