Baǵqa kirsem, baǵ shayqalıp qaraydı,Sıldırlaǵan japıraqlar shıraylı,Olar sıbırlasıp mennen soraydı,Shıraylı qız, súygen yarıń qayda? — dep.
Baǵqa kirsem baǵ ishinde qaraman,Shaqaları shar tárepke taraǵan,Ol da mennen bir sawaldı soraǵan,Shıraylı qız, yarıń qaysı jayda? — dep.
Baǵqa kirsem, qapa kewlim jaynaydı,Xosh hawazǵa baǵ búlbúli sayraydı,Jipek samal shashım tartıp oynaydı,Súygen yarıń, shıraylı qız, qayda? — dep.
Baǵqa kirsem, baǵman ekken nál bolıp,Irǵatılsam qos shaqalı tal bolıp,Aytar edim kelse yarım bar bolıp,Shıraylı qız, ıshqı otında shayda! — dep.
— XX ásir qaraqalpaq poeziyası antologiyası