ǴAZLAR USHAR

Ǵazlar ushar aydınlardan,Ǵańqıldasıp dúzep qatar.Kewlim tasıp ilhamlardanJúregimde shalqıp jatar.

Ǵazlar ushar aydınlardan,Salıp ne shoq namalardı.Sonda shıǵıp bir qumardanBoyıma kúsh taraladı.

Óazlar ushar aydınlardan,Nar qamıslar qalar páste.Alıslarǵa saǵımlanǵan,Qanat qaǵıp barar áste.

Ǵazlar ushar aydınlardan,Dizilisip túslik jaqqa.Qalǵım kelmeymen olardan,Tolǵanaman geybir waqta.

Ǵazlar ushar aydınlardan,Qıyalımday qanat qaǵıp.Kete almay bul jaylımlardan,Qanatları barar talıp.

Ǵazlar ushar aydınlardan,Jıllı jaqlar mánziline.Qaytpaq bolıp taǵı berman,Aralımnıń házligine.

Men qalaman bunda shalqıp,Qısında da, jazında da.Íssılarda kúyip-balqıp,Qısta tońǵan waǵımda da.

Gazlar ushar aydınlardan,Ǵańqıldasıp zordan-zordan,Keliw — shadlıq, ketiw — árman,Ǵazlar ushar aydınlardan.