Teńiz izlep keter sayılman,Bul jolda ne dártke qayılman.Allam, jannan ayırsań ayır,Ana-Aralımnan ayırma.

Suw kózleriń kelse qayımǵa,Barıw ushın hár dem tayınman.Usı jolda mayırsań mayır,Táǵdir, Aralımnan ayırma.

Suw «marjanı» bolsa qaliyma,Zor ırısqa xalqım jarıyma?!Kem nesiybe bolmaǵay insan,Allam, Aralımnan ayırma.

Dúkken kemem talay jayınǵa,Qalmasın hesh qaqsap qayırda.Babam, áwlad bárin asırǵan,Táǵdir, Aralımnan ayırma.

Mehir tógiń shıbın janına,Turanımnıń peri, ayına.Teńiz bolǵay jáhán ıqlası,Allam, Aralımnan ayırma.

Dástan bolǵan talay shayırǵa,Dáwlet qonıp Urge, Zayırǵa.Dáwran qayta dúrlesin deseń,Táǵdir, Aralımnan ayırma.

Duz quymaǵay atız, sayıma,Buyırmaǵay posıw payıma,Zúriyad óssin Ana diyarda,Allam, Aralımnan ayırma!Ana — Aralımnan ayırma!!!