POEZIYAǴA MIRAT
Óserbay XojaniyazovGezip kórdim kóp eldi, dámin tattım kóp astıń.Joldas boldım saparda talay-talay er menen.Awır júk bolsa kóterip, gey waqta qap qoldastım,Aytsam eger shınlıqtı jurtım ersi derme eken...
Unamasa xalqıma, qosıq jazdım demeymen,lnanbasa sózime, yoshıp jazdım demeymen.Neshshelerdi oylantıp, tolqıtpasa birewdi,Ashshı menen dushshını ashıp jazdım demeymen.
Janlı-jansız zatlardıń bári zibansız gúń emes,Qulaǵı bar tawdıń da, dawısı bar jerdiń de.Kimdi qalay sóyletiw hám túsiniw muń emes,Júrek penen tillesiw — tek ózimniń erkimde.
Quwanıshqa ortaqpan, ashıw-toqqa qayılman,Men de kóptiń birimen, heshkimnen joq ayırmam.Tuwǵan jerim — aq bulaq, tawsılmas bir ǵáziyne,Keliń, doslar, jırlayıq, mushayraǵa tayınman!
— XX ásir qaraqalpaq poeziyası antologiyası