QARA QOY

Kórip júrmen turmıstıń men qıyının,Ózim jalańayaq, jırtıq kiyimim,Jetimlikten bir shıqpadı búyirim,Shad bolıp, sharq urıp jazbadım bir boy.

Oyında ótpedi balalıq waqıtım,Jetim qaldım, tamaq izlep qoybaqtım,Qosıq aytıp aydalada zar qaqtım,Qosıǵım bolıp júr meniń, Qara qoy.

Quyrıǵıń kóp qurtlap, boldıń sen jataq,Seni qasqır tarttı, isim dım shataq,«Salaq shopan» degen aldım men ataq,Meni biyabıray ettiń, Qara qoy.

Mudam júrgen edim izińnen baqlap,Jatırǵnnda seni qasqır tamaqlap,Kózim kórdi, qorıqpadım alaqlap,Qasqırdan ayırıp aldım, Qara qoy.

Bas kdótertpey jattıń ishińdi tartıp,Bawızladım, ilaj qalmadı artıq,Awılǵa alıp keldim eshekke artıp,Etińe bir toyarman dep, Qara qoy.

Molla qayjaqlardan taptı rawayat,Etińdi qospadı jewge shariyat,(Qiyanet bolar ma bunnan da ziyat),«Haram ólgen» — dedi seni Qara qoy.

Írǵaladı Shımbırkóldiń qamısı,Iyrim tartar Aynajaptıń aǵısı,Dóhmetke keledi adam namısı,Moynıma túsip tur meniń, Qara qoy.

Qoy jayǵanım qara shógir toǵayı,Qara qoyǵa yar bolmadı «qudayı»,Bildirmedi, keldi qasqır jabayı,Ajeliń qasqırdan boldı, Qara qoy.

Tań sáhárden ornımnan turǵanman,Qoylarımdı otlaq jerge jayǵanman,Pıshaq tappay qıyaq penen soyǵanman,Sol sebepli «haram» óldi, Qara qoy.

«Qudayımnıń» bola berdi dawılı,Azan menen jawa berdi jawını,Bir pıshaq bermedi múyten awılı,Sol sebepli «haram» óldi, Qara qoy.

Múyten awılına qoyshı bolǵanman,Qara qoydı soyıp «hadal» qılǵanman,Mollası «haram» dep «haram» qılǵannan,Sol sebepli «haram» óldi, Qara qoy.

Iyeń seniń qıs ǵamıńdı jemedi,Qıstan arıq shıqtıń, mayıń kem edi,Arıqlıqtan molla «hadal» demedi,Sonıń ushın «haram» boldıń, Qara qoy.

Tariyxıńdı ettim Qara qoy bayan,Men gúnákar emes hámmege ayan,Teginge ólmediń, keltirdiń zıyan,Qunıńdı moynıma saldı, Qara qoy.

Bunsha qımbat bola berer me qoy da!Ádillik, insap hám hújdan qayda?Jartı jılǵa haqımdı aldı bir qoyǵa,Óligiń qımbatqa tústi, Qara qoy.

Qoldawlı Qállibek, qoyıń Qara qoy,Men bir jetim qolıńdaǵı bala ǵoy,Alǵan menen bayımassań, toymassaıı,Kerek bolsa jartı haqımdı ala ǵoy.