Aǵartıwdıń jıl quslarına

Sizlerdi kórgende eldiń jaslarıKewlińde bir ullı dárya jaǵalar.Aǵartıwdıń tuńǵısh qarlıǵashları.Jıl qusınday kózge ısıq, aǵalar!

Húrmet - jasúlkenge, jollar-jaslarǵa.Aldında aǵası bolsın baslarǵa.Alpıstıń qırawı túsip shashlarǵa,Ullı toyǵa aman jetken aǵalar.

Jaslar attan túsip qolıńnan alar,Jurt japırılıp sıylap, kórse quwanar,Daraqta túp birew, shaqa mıń bolar,Kóp jetkinshek jetildirgen aǵalar...

Kóbińiz balalıqtan máhrúm bolǵansız,Qarshadaydan qayqı tayaq alǵansız.Kimińiz mal baǵıp, oraq orǵansız,Ázelden ılayı pisken aǵalar.

Baxıtlı balalıq bolmay, saq sınıp,Jaslay kórip bárin - jaman-jaqsınıń.Uslap oshaǵınan quwırdaqshınıń,Internatqa bergen sizdi, aǵalar.

Jańa mektep berip jańa tárbiyat,Húkimet asıraǵan atańnan ziyatAwdarıspaq tańı, gózzal húrriyatTeperishlep shınıqtırǵan aǵalar.

Kimi Seyfulǵabiyt, kimisi Qasım,Jańashıl urpaqtıń jám etip basın,Qaǵıp-soǵıp mádeniyat arbasın,Taza jolǵa salıp bergen aǵalar.

Eskiliktiń qara, túńligin tuwrap,Jańa álip dúzip, xattı sulıwlap,«Qallash, latınlas!» dep ashshı qıyqıwlap,Tań azannan súrenlegen aǵalar.

Biriń Qallı, Nájim, birińiz Asan,Ádebiyat jıynap xalıqtıń awzınan,Izbasar qutılıp qara qoylardan,Kemliktiń kámalın kórgen aǵalar.

Ábdiraman jurttı awzına qaratıp,Saxna soǵıp, tańnıń nurın taratıp,Jolmırzalar jurtqa sózin jaratıp,Jańalıqtı dástan etken aǵalar.

Biri Orınbaev, biri Dosumov,Jańalıqtıń maydanında yosh urıp,Birazları Shaydakovqa qosılıp,Jamaylıq shayqasqa túsken aǵalar.

Qaljan, Qurbangúller, Jumagúl apa,Qızlarǵa bas bolıp shıǵıp saxnaǵa,- «Oyan, qızlar» dese Genjebay aǵa,Uyıqlaǵandı oyatqansız, aǵalar.

Jamaylıq aranı ashıp jik bolıp,Shaqası mıń shayqalmastay túp bolıp,Kim muǵallim, kimi náhán «úp» bolıp,Zamanında jurt soraǵan aǵalar.

Ǵarrılıqqa jeńildirmey qasarıp,Quwanıshtan qara kózge jas alıp,Xalqıń menen qayta tuwıp jasarıp,Tórde jaynap otırsızlar, aǵalar.

Qansha jańa áwlad qatarǵa tursa,Qartayar ma adam teń adım ursa!Júmek aǵa shákirtlerin shaqırsa.Jartı respublika oǵan «aǵa» lar.

Biz ushın keń súrdew salǵan jolıńız,Dańq, ataq ayamas sizden elińiz.Aldımızda uzaq aman bolıńız,Jıl qusınday qanat qaqqan aǵalar!