Kim bilmeydi, seniń ullı atıńdı,Kimler oqımaǵan jazǵan xatıńdı!Qızılqumda — Ámiwdárya boyında,Qaraqalpaq — bul da bildi dańqıńdı.

Oylamaǵan ediń tek óz mápińdi,Xalqıń ushın háwijlettiń pátińdi.Dushpanıńa qarsı bolıp udayı,Qosıq penen ayttıń ótkir gápińdi.

Shayır ediń sóz hasılın saylaǵan,Patsha biyge qarsı tisti qayraǵan.Kópshiliktiń pikirinen sóz aytıp,Xalqıń ushın azatlıqtı oylaǵan.

Sen ashıǵı ediń jańa ómirdiń,Talpınıp eń hallas urıp kewiliń.Biraq sonda qara júrek zalımlar,Erk bermedi degenine oyınnıń.

Patsha sorap otırǵanda elińdi,Qozǵasań da jazalmadıń belińdi.Saǵan qarsı sumlıq oylap jawızlar,llayıq taptı aqırında ólimdi.

Sen — danıshpan, súygen ul eń elińe,Aqıl menen oydı jıǵan kewlińe.Seniń sóziń júreginde xalıqtıń —Yadqa aytadı qosıǵıńdı bári de.

Kim umıtsın, Pushkin seniń atıńdı,Kim oqımas, hasıl-altın xatıńdı!Qaraqalpaq ulı — men de eskerip,Óz elimde kóteremen dańqıńdı.