Biraq, bazda geybirewler ushıraydı,Jańa ómirge jat kóleńke taslaydı.Kórgen waqta ondaylardıń qılwasın,Tap kózińe shóp túskenge uqsaydı.

Biri — házlik quwǵan, jalqaw, jan ayar,Ya dámegóylenip jurtqa qol jayar.Ya turpayı, ya jaǵımpaz «sıpayı»,Taǵı sonday jónsiz jalańqayalar.

Bazı birew aǵayinshil — jorashıl,Ayırmaydı istiń aǵın-qarasın.Tiyip-qashıp jalanǵandı máp biler,Oylar jalǵız úyin, qorır qorasın.

Birew maqtanǵanda — túpsiz shelektey,Ya qurı alapaǵa shapqan jel ókpe.Birew — jumıs dese mesheli shıǵıp,Sózde sheshen bolar jurttı sóyletpey.

Ósek-ótirikshi hám basqa taǵı,Illetler ushırasıp dım nalıtadı.Olar az bolsa da ómirge ziyan,Sebep, kishkene shóp te kóz awırtadı.

Solar — meniń mawasasız sıńarım,Ayamastan ash búyirden urarım.Solar — óz boyımdı uslap awlaqta,Basqaǵa juqpasın dep xızmet qılarım.

Sonıń ushın satira atın ertlermen,Túsirmespen satira otın bókterden.Kózdiń qarashıǵınday ómirimizdi,Tazalawǵa sonday qıyqım shóplerden.