1926–1985
Babash Ismaylov — shayır, dilmash, sınshı hám ádebiyat izertlewshisi.
B.Ismaylov 1926-jılı 12-iyunde Ámiwdárya rayonında tuwılǵan. 1942-jılı orta mektepti pitkerip, mektepte muǵallim bolıp isleydi. 1948-jılı Qaraqalpaq mámleketlik pedagogikalıq institutın tamamlaydı hám usı institutta oqıtıwshı bolıp qaladı. 1951-53- jılları oblastlıq partiya komitetinde instruktor , “Jas Leninshi” gazetasında redaktor (1953-1956), Ózbekstan Respublikası Ekonomika hám mádeniyat kompleksli institutında ilimiy xızmetker boldı.
1958-1961-jılları “Qaraqalpaqstan” baspasında bas redaktor, Qaraqalpaqstan mámleketlik televidenie hám radio esittiriw komitetiniń baslıǵı (1961-1963), 1963-jıldan ómiriniń aqırına shekem Oblastlıq partiya komitetnnde ideologiya bóliminiń baslıǵı bolıp isledi.
1965-jılı “Kúnxojanıń ómiri hám tvorchestvosı” degen temada kandidatlıq dissertaciyasın jaqladı.
B.Ismaylovtıń “Jeńis saatı ” qosıǵı 1943-jılı “Qızıl Qaraqalpaqstan” gazetasında basıldı. Shayırdıń “Gúllen, Respublikam”( 1954) “Geybirewdi ash búyirden” (1959), “Hárkimniń óz sıbaǵası”(1977), “Jıllar hám aylar” (1976), “Oqıwshılarǵa estelik” (1978). «Tańlamalı shıǵarmaları» basılǵan. Onıń 1972-jılı “Lirika hám satira ” degen toplamı rus tilinde járiyalandı.
B.Ismaylov A.T. Tvardovskiy, Ǵ.Ǵulam, M.Tursınzada, K.Yashen, I.Yuzeev, Xzmza Niyaziy, M .Rılskiy, Ǵ.Tokay, S.Oleynik ǵaǵı basqa belgili jazıwshılardıń shıǵarmaların qaraqalpaq tiline awdarǵan.
Ádebiyat izertlewshisi sıpatıńda B.Ismaylov “Kunxojanıń ómiri hám tvorchestvosı” (1961) degen monografiyasın bastırıp shıǵardı. Ol 8-10-klasslar ushın birinshilerden bolıp oqıw baǵlarlamasın dúzdi hám olarǵa arnap sabaklıqlar jazdı, alımnıń tayarlawı menen Kúnxojanıń, Ájiniyazdıń toplamları basılıp shıqtı.
B.Ismaylov Qaraqalpaqstan Respublikasına miyneti sińgen mádeniyat xızmetkeri (1968), Ózbekstan Respublikasına miyneti sińgen mádeniyat xızmetkeri (1969) húrmetli ataǵına iye edi, ol mámleketlik ordenler hám bir neshe mártebe Xúrmet jarlıqları menen sıylıqlanǵan. Shayır “Jıllar hám aylar” degen kitabı ushın Qaraqalpaqstan Respublikası Berdak atındaǵı mámleketlik sıylıǵınıń laureatı (1976) boldı. Shayır hám alım, jámiyetlik isker Qaraqalpaqstan Respublikası Joqarǵı Keńesine bes ret deputat bolıp saylandı.
Ol 1953-jılıdan Jazıwshılar awqamınıń aǵzası.