WATAN

Watan! — Sen ózińniń shın perzentińe,Bir keń túsinikseń, oylap qarasam.Anaw shetiń menen mınaw shetińe,Jayaw barar edim, jolǵa jarasam!Biraq, kózim jetpes tutas dalalar,Jetkermeydi maǵan, hátte, juwırsam,Mısal qıyalımday sheksiz ǵoy olar,Sen sonıń bárine pármana dursań!Bir jaǵıń Tyan-Shan, Ustirt bir shetiń,Qızılqum, Mırzashól. Ne degen keńseń!Álemniń sonshelli jolların óttim,Qaysı jánnetlerden, qáne, sen kemseń?!Ane, áste-aqırın batadı Sholpan,Quyash Shıǵıs betten saǵım taratar.Bir jaqlarda salsa qıyqıwın shopan,Diyqan qashshan turıp, nasbayın atar...Hám men oyanaman... jasıl toǵayda —Quslar shadıqurram sayrasqan sesten,Hám de sezimtallı samallar esken,Kewlimdi sergiter gózzal tańlarıń;Suwlar sarqırasıp há anaw sayda —Qosıq aytsa onıń boyında ósken.Nazlı qızlar yańlı sárwi tallarıń,Oy salar kewlime sıbırlap ásten...Tap jasap turǵanday bolaman sonda,Usı bir seslerdiń ruwxı menen!Sóytip keń álemge shıqsam, kem-kemnen —Lázzetten jep-jeńil seziler denem!Bilsem, dúnya maǵan qansha isengen!Ol jasıl toǵayın qızǵanbas mennen,Ol kórseter maǵan móldir shıqların,Kógildir aspanın, uzaq jaqların;Jazıq dalaların tabar kózlerim,Hám gózzallıq bolar mudam sezgenim.Sonda háyyiw aytqan hawazı menen,Xosh kewlimdi jáne xosh eter jeńgem,Sóytip usı dúnya erkimdi biylep,Onı tek súyiwge júregim kóngen!Solay hárbir kúnim baslanar biyǵam,O, mına kókirektiń keńligin aytshı,Bunshelli lázzettiń hámmesi sıyǵan!Sonıń bárin bergen Watanım, óziń,Janıma mádatkar mákanım óziń!..Bilemen, sen ushın urıs gezinde,Millionlar júregin jaw oǵı tesken,Sadıq bolıp tek te usı sezimge,Sen ushın ákem de janınan keshken,Sońǵı demge shekem olar sen desken!Áziyz topıraǵıńda jatır atam da,Meni álpeshlegen kempir apam da,Jatır onda anam, tuńǵısh nárestem,Qalay men solardı shıǵarıp esten,Súrme topıraǵıńdı máńgi súymespen?!Joq, basıńa awır kún tuwǵan gezde,Pidá bolıp meniń qorǵarım sense.Bul meniń shın antım, antım Watanım,Tóbem kókke jeter buǵan isenseń!