Jurttan kóp bilmeymen, biraq aytarım,Bes kúnlik dúnyada múriwbet yaxshı.Suwdan taza, sútten aq bolsın arıń,Bes kúnlik dúnyada múriwbet yaxshı.

Urıs-qaǵıs qırǵınlardıń salmaǵı,Mıń ese awırdur tastan tawdaǵı,Turmadı qulpırıp insannıń baǵı,Bes kúnlik dúnyada múriwbet yaxshı.

Kóz ashqalı urıs penen kelemiz,Aqıbeti jamanlıǵın bilemiz,Bile tura tisti qayrap ólemiz,Bes kúnlik dúnyada múriwbet yaxshı.

Adam tábiyatı neden jaralǵan?Bul sorawǵa juwap tappay hayranman,Urıstan kim qashan abıray alǵan,Bes kúnlik dúnyada múriwbet yaxshı.

Ómir jalǵız ret berilgen bolsa,Nesiybe tam-tamlap terilgen bolsa,Baq basqa ómirde bir márte qonsa,Bes kúnlik dúnyada múriwbet yaxshı.

Sol qonǵan baxıttı bilse jigitiń,Jaqsılardıń alsa aqıl-úgitin,Úzbese keleshekten arzıw-úmitin,Bes kúnlik dúnyada múriwbet yaxshı.

Aldap pánt beriwdi oylamaǵıl hesh,Biyinsap, biynamıs bolmaǵıl hesh pes,Jaqsılıq islegil bolsa daǵı kesh,Bes kúnlik dúnyada múriwbet yaxshı.

Hámmeni ózińdey kórse, sıylasa,Haq jolında shiyrin jandı qıynasa,Jetpesinge názer salıp qollasa,Bes kúnlik dúnyada múriwbet yaxshı.

Atım qalsın deseń jaqsı sıpatta,Kúshlige ázzini qaram, qıynatpa,Kún shıqqanǵa deyin ǵáplette jatpa,Bes kúnlik dúnyada múriwbet yaxshı.

Táme eń birinshi insannıń qası,Támegóydiń batpas boyına ası,Hám shıqpas daw menen jánjelden bası,Bes kúnlik dúnyada múriwbet yaxshı.

Hámeldi kóz etip táme etpegil,Hesh jerde miynetsiz nan joqdur jeńil,Kewlińdi «Haql» — tutıp «Yaratqan» — degil,Bes kúnlik dúnyada múriwbet yaxshı.

Sonda muradıń da hasıl boladı,Iyeń isiń aǵla, ańsat qıladı,Telek dánge, arshań zerge toladı,Bes kúnlik dúnyada múriwbet yaxshı.