BUL DÚNYA

Kimlerdi kórmegen, kimnen qalmaǵan,Adamata menen jaslı bul dúnya.Bárin bir shetinen áste jalmaǵan,Aydarha sıpatlı, baslı bul dúnya.

Dúnya deyip jandı otqa jaǵamız,Ótirik aytıp suwdan qurı shıǵamız,Onıń ushın haqqa nasaq taǵamız,Bárinen aybatlı pátli bul dúnya.

Dúnyanıń keynine jetpegen heshkim,Ol sızǵan sızıqtan ótpegen heshkim,Qansha dáwran súrseń, uzaǵı bes kún,Sonda da pal yańlı, tatlı bul dúnya.

Bul sonday jorǵadur, suwday aǵılar,Keshe-kúndiz segbir tartıp sabılar,Aqır bir kún súrnigip kep jıǵılar,Ázeliy usınday zańlı bul dúnya.

Hádden asıp umıttırıp qudaydı,Tıńlamas hesh waqıt — awhaldı jaydı,Aldap suwlap bir kún qattı mataydı,«Bul panı-yalǵanshı» atlı bul dúnya.

Íshqına más etip bizdi oynatıp,Esap-sansız laǵlı-marjan jıynatıp,Keyin atar zańǵar tasada jatıp,Sonıńday opasız lolı bul dúnya.

Birewlerge ada bolmas pal bergen,Birewlerge mal ústine mal bergen,Birewlerge ólemata hal bergen,Záhár aralasqan palı bul dúnya.

Aǵanı inige dushpan áylegen,Urısqa-jánjelge qushtar áylegen,Qanjar urıp bolıp pushman áylegen,Qolı barlıq waqıt qanlı bul dúnya.

Kóz bir qısım topıraqqa toladı,Gúliń qazan urıp bir kún soladı,«Alla bir kún amanatın aladı»,Demeydi-aw, eneǵar dáli bul dúnya.