Ábilqasım Ótepbergenov

    Á. Ótepbergenov - shayır, jazıwshı xám publicist.
Á.Ótepbergenov 1951-jılı 5-mayda Túrkmenstan Respublikasınıń Góne Úrgenish qalasında tuwılǵan. Ol orta mektepti pitkergennen soń 1968-jılı Qaraqalpaq mámleketlik pedinstitutınıń tábiyattanıw fakultetine oqıwǵa kiredi. Soń awıl xojalıq jumıslarında isleydi.
    Ol 1976-jıldan baslap “Jas Leninshi”, “Erkin Qaraqalpaqstan” gazetalarında, “Ámiwdárya” jurnalınıń bas redaktorı wazıypasın atqaradı. Házirgi wakıtta Qaraqalpaqstan Respublikası Teleradiokompaniyasınıń televidenie boyınsha bas redaktordıń orınbasarı bolıp isleydi.
    Á. Ótepbergenovtıń “Tamshılar” (1982), “Bulaqlar” (1990), “Dúnya bir ájayıp jaydur” (1993), “Dozaq ishinde” (1993), “Ashılmaǵan sır sandıǵı mendedur” (1994), “Eger kewlimdi xosh etse...” (1996), “Allańdı umıtpa” (1997), “Allada esap bar” (2007), “Ey, insan!” (2007), “Kún shıǵıs muxamları” (2007), “Sálmen iyshan dóxmet kurbanı” (2007), “Kimge kendur, kimge tardur bul dúnya” (2008), “Xalıqtan danaman dep oylama” (2009) atlı qosıqlar hám “Oynama, bala” (1984) gúrrińler hám “Dozaq ishinde” (1993) romanı jarıq kórdi.
    Ol túrkmen jazıwshısı B. Seytakovtıń “Qız salıǵı” romanın hám túrkmen shayırı A. Mamedovtıń “Kewlimniń shar aynası” degen qosıqlar toplamların qaraqalpaq tiline awdardı. 1994-jılı “Qaraqalpaqstan Respublikasına miyneti sińgen mádeniyat xızmetkeri” , 1997-jılı “Shuxrat medalı” menen sıylıqlanǵan.
    Á. Ótepbergenov 1993-jıldan Jazıwshılar awqamınıń aǵzası.