Xojabek Seytov

    Xojabek Seytov— shayır xám jazıwshı.
X. Seytov 1917-jılı 25-avgustta Taxtakópir rayonınıń Qarabuǵa awılında tuwılǵan.
Ol dáslep baslawısh mektepte muǵallim, sońınan Tórtkúldegi muǵallimler institutın pitkerip, oqıw bóliminin baslıǵı, Oblastlıq partiya komitetiniń instruktorı, radiokomitettiń baslıǵı boldı. Qaraqalpaq mámleketlik pedagogikalıq institutın pitkerip Jazıwshılar awqamınıń baslıǵı, “Sovet Qaraqalpaqstanı” gazetasınıń bólim baslıgı wazıypasında, keyin ala dem alıska shıqqanǵa shekem Jazıwshılar awqamında kórkem ádebiyattı násiyatlaw byurosınıń baslıǵı lawazımında isledi. Jazıwshı eki ret Xúrmet belgisi ordeni hám medallar, Ózbekstan xám Qaraqalpaqstan Respublikası Jokarǵı Keńesiniń Húrmet jarlıqları menen sıylıklanǵan, “Ózbekstan Respublikasına miyneti sińgen mádeniyat xızmetkeri” (1972) hám “Qaraqalpaqstan xalıq jazıwshısı” (1991) degen xúrmetli ataklarǵa iye. Shayırdıń “Alǵa jeńiske” (1944), “Baxıtlı ómir” (1944), “Ómir tańı”(1950), “Gúllengen awıl” (1955), “Tolqınlar” (1956), “Ámiw qızı” (1966), “Qızketken” (1957), “Báxárde Ámiw boyında” (1966) degen poeziyalık toplamları basılıp shıqtı. Onın poeziyalıq dóretpeleriniń “Tańlamalı shıǵarmaları” (1977) járiyalandı.
    X.Seytovtıń ózbek, rus tillerinde bir neshe toplamları baspadan shıqtı. Jazıwshınıń proza tarawında “Agronom predsedatel” (1956), “Mashaqatlı baxıt” (1958), “Háwirli samal” (1973) povest hám romanları járiyalandı, bulardıń ayrımları ózbek, rus tiline awdarılǵan.
    X.Seytov Tvardovskiydin «Vasiliy Terkin» poemasın (B.Qayıpnazarov penen birge) hám Mirtemirdiń «Qaraqalpaq dápteri» shıǵarmasın qaraqalpaqshalaǵan.
    X.Seytov 1943-jıldan Jazıwshılar awqamınıń aǵzası.