KEWIL JAQSÍ BOLSA MISLI GÚL BOLAR

Birewlerdiń kewline dúnya sıyǵanday,Sap aqıldı qola menen quyǵanday,Jaqsılıqtı jıyıp ákep qoyǵanday,Turısı ájayıp siyne me deymen.

Birew baz bir sózdi ilip sabaqqa,Sóyler bolar qarap qası qabaqqa,Birew kúyip janar nahaqqa, haqqa,Oylardı kóp nárse biyley me deymen.

Kewil kewillerdi tıńlar saz qılıp,Jipektey esilip jılwa naz qılıp,Birewdiń kewlin birew jaz qılıp,Jadıraw payıma tiygey-dá deymen.

Ayırıw ap-ańsat aqtı, qaranı,Bálkim, bir bul emes kewil talabı,Ol sál-pál qabarsa «tońıp» qaladı,Jılıtıw ǵániymet áyley me deymen.

Baz bir jaqsılıǵıń ótelip turar,Ol hátte jáhándi kóterip turar,Kewil sál aljassa qátelik bolar,Sonday da totıqqan záńdey me deymen.

Kewil tazalıǵın táriplep jaqlap,O, qanday qádirdan hadalıy haq gáp,Sonı ot ishinde paxtaday saqlap,Oylar san qubılıp gúlley me deymen.

Kewiller túrli kóp bazda bir bolar,Totıqpas sondayda misli zer bolar,Kewil jaqsı bolsa mısal gúl bolar,Ol hárgiz shubhanı bilmey me deymen.

Kewil jartı bolsa ol daǵı jetim,Dúnya pútin bolsın, kewil hám pútin,Jaqsı sóz jaynatsın álemniń betin,Jaman sóz kereksiz zildey me deymen.

Bar kewildi qádirleyik, adamlar,Hár kewildi qádirleyik, adamlar,Bir-birewdi ádiwleyik, adamlar,Ol bizge quyash hám kúndey me deymen.