QONÍRAT

Jatqanda uyqıda dem alıs kúni,Basımnan kóterip bir gózzal peri.Tur-turlap, qıtıqlap oyatıp edi,Elektr toǵınday tartadı lábi.

Otırdı koykama kúlimlep kelip,Baǵında taranǵan tawıstay bolıp,Betimnen sıypadı, basımdı tarap,Báhárdiń jaǵımlı jelindey bolıp.

Ne jazdıń, oqıyıq, basıńdı kóter,On saat uyqılapsań, tur endi jeter.Az uyqıla, kóp isle at qalsın keyin,Kóp jatsań ómiriń tek bosqa óter.

Ushar ma bolmasa qustıń qanatı,Miynetsiz shıǵar ma, jigittiń atı.Iigittiń boyında óneri bolsın,detpeydi tek bolǵan menen sawatı.

Shayır bolsań turmıstı bil, oqı kóp,Oqımay-aq bilemen dep júrme tek.Bolsın shayır fantaziya júregi,Saat sayın urıp turǵan lúpildep.

Basına qonbasa qıyaldıń qusı,Aytpay-aq belgili shayırdıń kúshi.Gewdede dárman joq, tıpırlar ayaq,usınan ótkende ózinen kishi.

Dep maǵan janımda qara kóz peri,Jatqızbay aqırı turǵızıp meni.Shayır — dep túrtkilep nervama tiyip,Shayırlıq duxımdı qozdırdı ózi.

Aldıma qoydı da bir qálem, qaǵaz,«Sóylewin sóyleyin, jazıwın sen jaz.Dedi de «Qońırat» dep basladı sózin,Men jazdım, ol peri sóyledi biraz.

Sende men tuwıldım, kámalǵa keldim,Janıma jasımnan kúsh-quwat berdiń,Jerińnen, suwıńnan men ráhát kórdim,Janıma jaǵımlı samalıń seniń.

Qońırat, anamsań belgili sırıń,Maǵan tanıs seniń oy menen qırıń,Qara bult serpilip ústińnen búgin,Quyashtay ashıldı qabaǵıń seniń.

Jadırap jaz shıǵıp ashıldı gúliń,Sayradı baǵıńda sesli búlbúliń,Kartań da jańarıp ózgerdi túriń,Baslandı haqıyqıy zamanıń seniń.

Sende kún házir de jaynaǵan jerde,Belgili jay boldıń baxıtlı elde,Quwanısh tasadı, árman joq sende,Ashıldı jadırap jamalıń seniń.

Oqıǵanday bolar qızıqlı dástan,Aytıp berse ana ótkenin bastan,Sen — anam, kóp nárse úyrettiń jastan,Yadımda mınanday sırlarıń seniń.

Oq penen jaralap jazıqsız jerdi,Ómirge ot qoyıp shuwlatıp eldi.Qorladı bóridey Xiywanıń xanı,At artına salıp qız, kelinlerdi.

Hárbir el qorǵawǵa óziniń jerin,Bilegin sıbanıp, buwınıp belin,Qolına tuw alıp, tulparǵa minip,Júreginde saqladı eliniń kegin.

Jıynalǵan xalıqlar saqlanıp jawdan,Tallıqtıń boyına saldı bir qorǵan,Qorǵanǵa «Qońırat» dep berdi laqap,Kóp bolǵanǵa Qońırat degen ruwdan.

Bul qalanı xan ózine alıwǵa,Baǵındırıp xalqın qulı qılmaǵa.At qoysa da dúbeleydey burqırap,Namıs kórdi Qońırat qulı bolmaǵa.

Alalmastay xalıqtıń heshbir dushpanı,Boldı Qońırat gúrestiń shın shtabı.Qońıratlılar jawǵa qarsı qarısıp,Tulpar minip, qolına tuw usladı.

Óziniń xalqınıń namısı ushın,ómirin baǵıshlap jumsaǵan kúshin,Dushpanı bas iygen suwıtsa túsin,Edigedey bolǵan ullarıń, Qońırat.

Jaynaǵan kózleri megzegen kúnge,Qasları qıyılǵan súrtpey-aq súrme,Jiyrenshedey sheshen sóylese tilge,Sonıńday sup-sulıw qızlarıń seniń.

Ózińde kúshi bar ullı bir eldiń,Erińde kúshi bar tasıǵan seldiı,Dápterinen qaǵaz alıp kewildiń,Jazǵanda tawsılmas sırlarıń, Qonırat.

Ózgerip áyyemgi eski karta,Jáhánde jasalıp bir qızıl dúnya,Boldı seniń eski dáwiriń zım-zıya,Jaynaydı quyashtay nurlarıń, Qońırat.

Sen haqqında qozǵap kewildiń gúlin,Sayratııń qawsırma jaqtıń búlbúlin,Qálem tarttım, ayǵıshlap dápterdiń júzin,Aq sút bergen anam, ádiwli Qońırat.