1909–1942
Mırzaǵaliy Dáribaev — shayır, jazıwshı hám dramaturg.
M. Dáribaev 1909-jılı Qońırat rayonında tuwılǵan. Ol 1929-jılı pedagogikalıq kurstı pitkerip, óz awılında muǵallim bolıp isleydi. 1935-jılı Tashkenttegi Orta Aziya awıl xojalıq mektebin pitkeredi, soń “Qızıl Qaraqalpaqstan” gazetasında mádeniyat bólimin basqaradı, bir qansha jıllar dawamında “Qızıl Qaraqalpaqstan” gazetasında, Jazıwshılar awqamında juwaplı xatker xızmetin atqaradı hám usı gazetanıń partiya turmısı bóliminiń baslıǵı bolıp isleydi. Jazıwshı 1942-jılı samolyot apatınan mezgilsiz qaytıs boldı.
Jazıwshınıń dáslepki shıǵarmaları 30-jıllardıń basında járiyalandı. Onıń “Qosıqlar” (1930), “Jeńiwshiler” (1940), “Gúreske”(1942) degen toplamları basılıp shıqtı. Sońǵı jılları jazıwshınıń “Qosıqlar hám poemalar” (1954), “Shıǵarmaları”( 1958),“Tańlamalı shıǵarmaları” (1963), “Qálbiyke” (1984) degen toplamları járiyalandı.
M. Dáribaevtıń dramaturg sıpatıńda “Kóklen batır” (1936), Árman” (1940),“Ǵárip-Ashıq”(1939), “Jańa adamlar” (1939) atlı pesaları bar. Onıń proza tarawında “Mıńlardıń biri” (Qaraqalpaqstan ádebiyatı hám iskusstvosı”. 1940, N1-6) degen povesti Qaraqalpaq prozasınıń káliplesiwinde ayrıqsha áhmiyetke iye. Jazıwshınıń geypara shıǵarmaları rus, ózbek, qazaq hám taǵı basqa tillerge awlarılǵan.
M. Dáribaev Pushkin, Lermontov, Nekrasov, Shevchenko, Bayron, Franko, Toqtaǵul, Jambıl shıǵarmaların Qaraqalpaq tiline awdarıwǵa qatnasqan shayır.
M. Dáribaev 1936-jıldan Jazıwshılar awqamınıń aǵzası.