Úlkenge jaǵımpaz jaǵınǵan waqta,Jaqsıǵa jaman at taǵılǵan waqta,Aq qara kúye jaǵılǵan waqta,Hújdan, sen tunshıǵıp qalmadıńbeken?

Ǵárrem ádillikti ermek etkende,Onı iyni menen qaǵıp ketkende,Biyádep ǵoddaslap tórge ótkende,Hújdan, sen tunshıǵıp qalmadıńbeken?

Biyik sózler qosıp aytqan gápine,Mánisin paydalanıp jalǵız mápine,Sóytip dárt jamaǵanda seniń dártińe,Hújdan, sen tunshıǵıp qalmadıńbeken?

Menmennen kúsh alıp eser eskende,Aqıldıń dıńǵırlap miyin teskende,Kátquda táǵdirin solar sheshkende,Hújdan, sen tunshıǵıp qalmadıńbeken?

Sen júrgende sózdi is penen ólshep,Adillik jolına janıńdı tósep,Hámmeniń durıslı bolıwın kúsep,Jalıǵıp, talıqsıp qalmadıńbeken?

Men seni oylayman, ayayman hár kún,Janım, seniń kúshli edi ǵoy erkin!Bunıń bári saǵan sabaqdur, bálkim?!Qáytse de tunshıǵıp qalmadıńbeken?

Qıyanat shırası sónip kiyatır,Sen kútken tuqımlar ónip kiyatır,Bári jaqsılıqqa dónip kiyatır,Hújdan, sen tunshıǵıp qalmadıńbeken?

Qáne, hújdan, kiris tigip basıńdı,Qayǵısız ish endi tatlı asıńdı,Qoy, sen eldiń arın arlamasıńdı,Gúres nátiyjesin berip kiyatır.

Sózimiz sózge usap, isler iske usap,Adam adamlarǵa, kúshler kúshke usap,Múlklerimiz iyesi bar múlkke usap,Gárremdi durıslıq jeńip kiyatır.

Burın qol jetpestey bolǵan alıslar,Biz azıraq joytıp alǵan namıslar,Kewlimizge kóp quwanısh baǵıshlap,Bizge tuwrı qarap kúlip kiyatır.

Dúnya quwǵan ólermenlik pıǵıllar,Birin-biri qoltıqlaǵan shuǵıllar,Materiallıq hám ruwxıy shıǵınlar,Aldı alınıp, mine, kemip kiyatır.

Bir waqta birewler irikken qolımız,Bir waqta birewler japqan joǵımız,Uzayıp, ashılıp ońlı-solımız,Qayta kewlimizge enip kiyatır.

Qáne, hújdan, kiris tigip basıńdı,Qoy, sen eldiń arın arlamasıńdı,Shaqmaqtıń tasınday ayt ırasıńdı,Óziń júrer jollar keńip kiyatır.