Qustay ushar adamları,Bilimli el isler bári,Mal isleytuǵın islerdi,Ot bilán suwǵa qaldırdı.

Dúnyanı gezdi jalıqpay,Hár is bilgenge anıqtay,Ómir súrdi hesh tarıqpay,Qaznasın pulǵa toltırdı.

Biziń aqılımız alıspay,Bilgen el bilán tanıspay,Ele hám bolsa qalıspay,Baylanbaq kerek belbaǵdı.

Atıń bolsa bayraqta shap,Jarıspastan bolmas sınap,Jas tuwǵanım jolıńdı tap,Bul isti sizge qaldırdı.

Qatarıń ketti uzaqqa,Umtılıń qalmań azapqa,Túsip qalmayıq duzaqqa,Jurtlar degeniń boldırdı.

Biz nadan boldıq, bos júrdik,Biykarǵa saqal óstirdik,Dúnyanıń jayın soń bildik,Nadanlıq artqa qaldırdı.

Óner-bilim el kórki eken,Eskermedik bul ne degen,Qartlıq, nadanlıq bir jerden,Góya belimdi sındırdı.

Biz qaldıq, endi Siz barsız,úmit etilgen suńqarsız,Bildik xızmetke tayarsız,— «Jol bolsın», — pátem sol bolsın.