Májiytov Seyfulǵabit

Seyfulǵabit Májiytov — XX ásirdegi qaraqalpaq ádebiyatın baslawshılardıń biri, shayır, prozaik hám dramaturg.
S.Májiytov 1869-jılı Kazan guberniyasınıń Arshan tuwılǵan. 1880-jılı onıń úyi dáslep Qazaqstannıń Aqtóbe oblastına kóship keledi, sońınan kóp uzamay Qaraqalpaqstannıń Tallıq degen jerine qonıs basadı. Sol waqıtta ádewir sawatı bar Seyfulǵabit Tallıq volostınıń esap-sanaǵın alıp baratuǵın xatkeri boladı (1884-89). Ol 1920-jılları Qońırat rayonlıq atkarıw komitetiniń xatkeri, rayonlıq xalıq bilimlendiriw bóliminiń baslıǵı (1921), bir qansha jıllar “Erkin Qaraqalpaq” gazetasınıń juwaplı xatkeri lawazımlarında isleydi. Ol sońǵı jılları Qıpshaqta suw xojalıǵı tarawında, 1934-jılı Tórtkulde úlketanıw muzeyinde de xızmet atqaradı. 1938-jılı repressiyaǵa ushırap qurban boldı. S. Májiytov poeziya tarawında ónimli jazǵan shayır. Onıń bir qatar shıǵarmaları ózi dúzgen “Álipbe” (1925), “Oqıw kitabı” (1925), “Egedeler sawatı” (1925), “Qaraqalpaq ádebiyatınıń jıyıntıǵı” (1928) hám shayırdıń óziniń “Tańlamalı shıǵarmaları”nda (1965) orın alǵan. Sonǵı jılları shayırdıń “Ata menen bala” (1970) degen gúrrińler toplamı hám “Shıǵarmaları” (1993) qayta tayarlanıp basılıp shıqtı. S.Májiytov dramaturgiya tarawında “Sońǵı selten” (1928), “Sabaq”, “Jigit boldıq”, “Ernazar alakóz” (1927), “Baǵdagúl” (1935), “Gúlim-Tayman” sıyaqlı pesaların jazdı. Jazıwshınıń “Qulmurat”, “On toǵız”, “Súyin hám Sara” romanları qoljazba túrinde qalıp ketken.
S.Májiytov 1924-jılı Xorezm Xalıq Respublikasınıń “Qızıl bayraq” ordeni menen sıylıqlanǵan.