— Babamlardıń qoyǵan atı «qabaq tárezi»,Haqıyqatlıq — ólshemdegi eń biyik tawım,Mıń-mıń jıllar óz jelkemde kóterip keldim,Zattı emes, adamlardıń obal-sawabın.
Jıl dizbegin jetelegen ásirler jetip,Mine, búgin sap metaldan úrim-putaǵım.Gramm emes, tonnalardı birden ólshetip,Diyqanlardıń artıp atır abıroy-ataǵı.
Avteń, átteń, qulqınınıń qulı bolǵanlar,Bazda qozǵaw salıp keter namıs-arıma.Kisi haqısın «urıp qalıp» tutılǵan sapar,Jala jawıp qutıladı-aw urpaqlarıma.
Al, shınında táreziniń tawlap «qulaǵın»,Degenine kóndirip júr, kewlim biyqarar.Qıyanetti kórip turıp bozlap jıladım,Urpaǵımnıń ar-namısın qorǵań, adamlar!
— XX ásir qaraqalpaq poeziyası antologiyası