1944–
Kóbeysin Ernazarov — shayır hám jazıwshı.
K. Ernazarov 1944-jılı 5-fevralda Qonırat rayonında tuwılǵan. Ol 1962-1967-jılları Qaraqalpaq mámleket- lik pedagogiqalıq institutınıń tariyx, qaraqalpaq tili hám ádebiyatı fakultetin tamamladı.
1967-1985-jılları Respubliqalıq úlketanıw muzeyinde, Ózbekstan Ilimler Akademiyasıniń Qaraqalpaqstan bóliminiń N. Dáwqaraev atındaǵı Til hám ádebiyat institutında ilimiy xızmetker, “Qaraqalpaqstan” baspasında redaktor bolıp isleydi. Onıń qosıqları hám gúrrińleri studentlik jıllarda “Sovet muǵallimi”, “Jetkinshek” gazetalarında járiyalandı.
Sońday-aq, “Bosaǵa” (1985), “Muzalar dúnyası” (1988), “Jaqsılıq hám jamanlıq haqqında ertek” (1990), “Keshki saat altıdan keyin” (1992), “Saqal” (1994), “Esitpegen elde kóp” (1996), “Adaq qalasın izlep” (1997) atamasındaǵı poeziyalıq hám prozalık toplamları baspadan shıqtı. Ol “Daǵıstan shayırları” (1983), “Planeta xawazı” (1987) toplamlarına kirgen bir qatar shıǵarmalardı, sonday-aq túrkmen shayırı A. Mámbetovtıń “Kewilimniń shar aynası” (1991) toplamın qaraqalpaq tiline awdarǵan.
K. Ernazarov 1993-jılı Qaraqalpaq folklorınıń 20 tomlıǵın jıynaw hám baspaǵa tayarlawǵa belsene qatnasqanlıǵı ushın Qaraqalpaqstan Respublikası Berdaq atındaǵı Mámleketlik sıylıqtı alıwǵa miyasar boldı.
Ol 1999-jıldan Jazıwshılar awqamınıń aǵzası.