Keńesbay Raxmanov

    Keńesbay Raxmanov — shayır hám dramaturg.
Ol 1942-jılı 18-sentyabrde Kegeyli rayonınıń aymaǵında tuwılǵan. Orta mektepti pitkerip awılda jumıs isleydi, 1969-jılı Qaraqalpaq mámleketlik pedagogikalıq institutın tamamlap, televidenie hám radio esittiriw komitetinde dáslep aǵa redaktor, soń bas redaktor lawazımında isledi. Keyin respublikalıq jas tamashagóyler teatrınıń ádebiy bóliminde, “Ámiwdárya” jurnalında pozeiya bólimin basqardı. Bir qansha waqıt Jazıwshılar awqamında ádebiyattı násiyatlaw byurosınıń baslıǵı, ómiriniń aqırına shekem mámleketlik televidenie hám radio esittiriw kompaniyasında xızmet etti.
    Onıń “Saǵan asıǵaman” (1970), “Ómir tolǵanısları”, (1974),“Tań ashıǵı” (1978), “Ómir, sen ullısan” (1981), «Mánzilim alıs» (1995) qosıqpar toplamları «Aqıbet» (1985), «Payǵambar jasındaǵı kúyew» (2010) romanları basılıp shıqtı.
    K. Raxmanovtıń “ Kelin” (1976), “O dúnyaǵa mirát” (1976), “Jaralı júrekler” (1977), “Eglengen báhár” (1978), “Laqqılar emlewxanada” (1979), “Mamamnıń jetinshi bayı” (1989) sıyaqlı pesaları házirgi waqıtları teatr sahnalarında qoyılıp atır. Ol “O dúnyaǵa mirát”, “Kelin” pesaları ushın Qaraqalpaqstan Respublikası Berdaq atındaǵı mámleketlik sıylıqtıń laureatı boldı, “Karaqalpaqstan xalıq, shayırı”, “Qaraqalpaqstan Respublikasına miyneti sińgen kórkem óner ǵayratkeri” ataǵına iye.
    K.Raxmanov 1972-jıldan Jazıwshılar awqamınıń aǵzası.