Kimdi eljiretpes ósken awılı,Kimdi qaljıratpas ómir dawılı.Buwrıl shashlı shayır kórip elatın,Emirenedi, egiledi bawırı.
Usı awıldıń besiginde terbeldim,Ulı boldım, uwız sútin teń kórdim.Eńbekledim keregege asılıp,Jerden jeti tayaq jedim túrgeldim.
Usı awılda asınǵanman sumkamdı,Sezdim qulash jayǵan jaslıq urqandı.Usı awılda tań atarda gúl jarıp,Batırǵanman talay úrker sholpandı.
Usı awılda qanat qomlap túledim,Jollama alıp tıń saparǵa jónedim.Xızmetimdi qásterlese elatım,Men de kewlim bárjay boldı der edim.