QAYTÍW

Saǵınısh demleri kewil suwıtpay,Diydar kórisiwge ábden asıǵar.Jumıs babı menen jaqın juwıqta,Júrgenler qaytadı bosaǵasına.

Tábiyat máwsimi tur erkeletip,Gúz paslı altın puw búrkti baǵlarǵa.Xoshlasıw názerin bazarlıq etip,Quslar qaytıp barar jıllı jaqlarǵa.

Ómir tawsılmastay sırlarǵa tolı,Waqıt mayatnik bop basın shayqadı.Perzentiń, aqlıǵıń, shawlıǵıń bolıp,Balalıq qaytadı, jaslıq qaytadı.

Minezge say bolsa maqul ǵoy kórik,Qıyal gá múláyim, gá shapshıp atar.Isengen adamnıń pásligin kórip,Kewil qaytatuǵın retler de bar.

Kúnler ótip atır birim-birimlep,Olar jaqsılıqtan xabar aytadı.Juldızday jımıńlap, kúndey kúlimlep,Muńayǵan júzlerge kúlki qaytadı.

Qıyın ǵoy aqpasa sezimler yoshıp,Sózge berilmese kewil aytarı.Taǵı tuwılajaq kútken bir qosıq,Shayırdıń qálbine ilham qaytadı.